Былтыр абыстол (ноябрь) айда «Кавказцемент» АО-да ремонт ишле башланнгандыла. Ала 2019-чу джылны хычаман (май) айына дери барлыкъдыла.

Ол заманны ичинде «ЕВРОЦЕМЕНТ групп» «Кавказцемент» АО-ну ремонту бла модернизациясын этерге 1 миллиард сомдан артыкъ ачха бёллюкдю. Аны себеби  «Кавказцемент» АО «ЕВРОЦЕМЕНТ групп» холдинге киреди.

Ремонтну кёзюуюнде «Кавказцемент» АО-ну иш кереклери джангылагъа ауушдуруллукъдула, автоматизация кенг сингдирилликди. Ол затланы кючлеринден чыгъарылгъан продукцияны багъасы тюшюб, асыулулугъу ёсерикди. Предприятие, бёлюнмей ишлегени бла да къалмай, Эресейни къыбыла джанын агъачлы цемент бла толу баджарыб да турлукъду.

Алай бла «Кавказцемент» АО продукция чыгъарыуун ёсдюрюрге хазырланады. Ол себебден ол джангы сезоннга бусагъатда ишлеб тургъан печлери бла бирге эндиге дери хайырландырылмай тургъан печлерин да хайырландырыр муратлыды.

2019-чу джыл башил (январь) айда предприятие кесини клинкер холдинги бла статистика решёткасыны установкасына реконструкция этерикди. Байрым (февраль) айдан хычыман айгъа дери кёзюуде, планда кёргюзюлгенича,  таш тартыучу эмда цемент этиучю тирменлерине къарарыкъды.

Ол ишле оборудованиени иш баджарыууну коэффициентин кёлтюрюрге, асыулу продукция чыгъарыб турур хыйсаб къураргъа тамал саллыкъдыла.

Эсигизде болур: былтыр Сочиде болгъан Инвестицион форумда Къарачай-Черкесияны Башчысы Темрезланы Рашид, цемент чыгъарыуну ёсдюрюу бла аны агъачлылыгъын кёлтюрюуню юсюнден «ЕВРОЦЕМЕНТ групп» холдингни президенти Скороход Михаил бла келишиу этиб, анга къол салгъан эди. «Кавказцемент» АО-гъа ремонт этиу бла аны модернизациясын бардырыуну ишлери анга кёре этиле турадыла. Ол ишле кеслери да этаплагъа юлешиниб бардырыладыла. Биринчи этапха кирген магъаналы джумушла этилиб  да бошалгъандыла.

Бусагъатда экинчи этапда этилирге белгиленнген ишле бла кюреше турадыла. Аны кёзюуюнде предприятиени аз энергия къоратхан иш кереклери, тирменини сепараторлары джарашдырыллыкъдыла, кёб тюрлю башха джумушла тындырыллыкъдыла. Ала мында чыгъарылгъан продукцияны санын ёсдюрюрге эмда аны асыулулугъун кёлтюрюрге  кючлю тамал, хыйсаб къурарыкъдыла.

 

 
{jcomments}