«Бирикген Эресей» политика партияны иши адамла бла байламлылыкъда къуралыргъа керекди. Аны эсге ала джамагъат бла тюбешген аралыкъланы ишлерин эм иги технологияланы хайырландырыб бардырыргъа борчлудула. Аны юсюнден партияны Баш кенгешлерини бирикген джыйылыуларында партияны Председатели, Премьер-министр Дмитрий Медведев билдиргенди. Джыйылыугъа КъЧР-ни Башчысы Темрезланы Рашид да къошулгъанды.
Джыл сайын болуучу конференциягъа быйыл 450 адам баргъанды. Конференцияны пленар джыйылыуу «Бирикген Эресей» партияны Председатели, РФ-ны Правительствосуну Председатели Дмитрий Медведев къошулуб бардырылгъанды.


«Джашагъан джерибизге, джылыбызгъа да къарамай, биз барыбыз да бусагъатны адамларыбыз. Джаш тёлю хапарны кёбюсюн (джыллары келгенле да) телефондан, компьютерден, планшетден аладыла. Ол себебден эм иги технологияланы хайырландырыргъа керекбиз.
Бу конференцияны джылны арасында партияны джашауунда магъаналы ишлени сюзер ючюн бардырабыз. «Бирикген Эресей – тюрлениулеге джол тутуу» («Единая Россия – курс на перемены») деген статьямы да аны ючюн джазгъанма. Алай а анда айтылмагъан, белгиленмеген кёб джумушубуз барды. Аланы сюзерге джыйылгъанбыз бюгюн», - дегенди Д. Медведев.
Ол бирикгенэресейчилени ишчи кадрланы хазырларгъа чакъыргъанды. «Саулай депутат корпусну файдалылыгъын да эсге ала, эм игилени алгъа тутаргъа керекбиз. Партияны чёб атыууна нек къошулургъа излегенлерин ачыкълаб, депутатха кандидатла кеслерини башламчылыкъларын амалсыз басмаларгъа борчлудула. Аланы излемлери, берген сёзлери къагъытха тюшюб, сайлаучуланы алларына барса, аны магъанасы терен болады эмда хар кандидат сайлаулагъа нек баргъаны ачыкъланады. Регионда социал проектлени хайырландырыу сынам дагъыда аны кибик ишле болургъа тыйыншлыдыла аланы программаларында. Ол затлагъа сайлауланы кёзюуюнде уллу эс бёлюннюкдю», - дегенди Д. Медведев.
Волонтёрла, джаш тёлю, коммерциясыз бирлешликле (НКО) бла иш джюрютюуню игилендирирге керекди. НКО-гъа болушлукъну кенгертирге керекди, ол социал джумушлагъа табышлы адамланы тартыргъа болушурукъду, корпоратив грантла бла корпоратив волонтёрлукъну айнытырыкъды. Гражданла кеслери теджеген социал магъаналы башламчылыкъланы да джыяргъа керекди, - дегенди Д. Медведев.

Энтда бир оюм – «Бирикген Эресейни» ачыкълыгъын ёсдюрюу.
«Партияны бегимлерин джамагъат сюзерча ишни алай къураргъа тыйыншлыды. Бюгюннгю дунияда хар адамны да тёрт джанындан джангылыкъла эмда башха хапарла кёб бериледиле. Ол себебден «Бирикген Эресей» партияны юсюнден керти, магъаналы хапарла бла толу шагъырей этерге керекди. Ол заманда алдауукъ хапарла азыракъ боллукъдула. Партиябызны акъылын, оюмун, орнун адамлагъа ангыларгъа тынч боллукъду. Дагъыда социал ишлени, миллет проектлени джашауда бардырылгъанларындан хапар берген журналистлени араларында конкурсла бардырыргъа, кёллерин кёлтюрюрге, джол берирге керекди», - деб чертгенди партияны Председатели.
«Аллай конкурслада сынгар иннетлери «Бирикген Эресейни» иннети бла бир болгъан журналистле тюл, журналист тинтиулени, кемликлени хыртха ургъан, тюзлюкню джакълагъан тири граждан оюмлары болгъанла хорларгъа керекдиле. Хауадан алыннган тюл, керти джамагъатда болгъан джарсыуланы ачыкълагъан статьяланы джазгъанла тыйыншлыдыла алчы болургъа», - дегенди Д. Медведев.
Партияны башчысы джамагъат приёмныйлени кенгертиуню юсюнден башламчылыкъны да къабыл этгенди. «Келигиз, джангыртайыкъ, кенгертейик адамлагъа теджеген джумушларыбызны, аланы ичинде айырыб айтыргъа излегеним, гражданланы Интернет бла джиберген тилеклерине, электрон къагъытлагъа къараргъа керекди. Айхай да, миллет проектлени магъаналарын, джашауда къалай бардырылгъанларын, алагъа ким джууаблы болгъанын дагъыда аны кибик талай затны ангылатыр ючюн джамагъатны хапарлы этгенлей турургъа керекди», - дегенди Дмитрий Анатольевич.
Джыйылыуну ахырында теджелген башламчылыкъланы бир айны ичинде джарашдырыргъа Баш Советни президиумуна буйрукъ бергенди.
Конференциягъа хазырланнган кёзюуде «Бирикген Эресей» политика партия бла РФ-ны Правительствосуну кенгешлери болгъанды. Анда «Миллет проектле адамланы кёзлери бла» деген джумуш (сервис) къуралгъаныны юсюнден баямланнганды. Бу джумуш миллет проектлени джашауда бардыргъан заманда джамагъат бла къысха байламлылыкъ тутаргъа болушурукъду.
КъЧР-ни Башчысыны эмда Правительствосуну пресс-къуллугъу.
 
{jcomments}