Байрам кюнде Черкесскени ара майданында КъЧР-ни Башчысы Темрезланы Рашид муниципал шахарла бла районланы администрацияларыны башчыларына къууанч халда 32 автотранспортну ачхычларын бергенди.

 Аланы 13-сю «Терк болушлукъну» машинасы, 16-сы школ автобусла, 3-сю да спортчуланы эришиулеге джюрютюрге джораланнган автобусла эдиле.
Темрезланы Рашид чертгенден, бу автотранспорт республикагъа «Саулукъ сакълау», «Окъуу», «Спорт – джашауну мардасы» деген миллет проектлени джашаугъа сингдириуню тамалында берилгенди.
«Къарачай-Черкесиягъа джангы машинала берилгендиле. Ала республиканы районлары бла шахарларына чачыллыкъдыла. Машинала сабийлени джюрютюрге эмда медицина учреждениелеге джораланнгандыла. Аны бла да къалмай, спорт учреждениелеге да 3 джангы автобус беребиз. Джангы автобусла спортчуланы медаллагъа, джангы джетишимлеге учундургъан затла  боллукъларына ишегим джокъду», - дегенди Темрезланы Рашид.
Андан сора Темрез улу джыйылгъанланы Къарачай-Черкесияны эмда Черкесск шахарны байрам Кюнлери бла алгъышлаб, муниципал шахарла бла районланы администрацияларыны башчыларына машиналаны ачхычларын бергенди.
Машиналаны ачхычларын алгъанларындан сора Чомаланы Алим-Джашар КъЧР-ни Башчысына, Теберди шахарда джашагъанла бла тюбешиуюнде «Терк болушлукъ» машина берирге деген сёзюн къысха заманны ичинде толтургъаны ючюн, тебердичилени атларындан разылыгъын билдиргенди.
Школ автобуслада ГЛОНАСС системаны тамалында навигация комплексле, тахографла дагъыда башха керекли затла бардыла. «Терк болушлукъну» машиналары да ГЛОНАСС система, солуу аппаратура, транспорт шиналаны комплекти, носилкала, фельдшерге керекли затла бла баджарылыбдыла.