Эресей Федерацияны Президенти Владимир Путин мындан алда РФ-ны Конституциясына тюрлениуле киргизиуню хакъындан ишлеген къауум бла тюбешиб, аланы оюмларына тынгылагъанды, кесини кёлюне келгенни да билдиргенди.
Ушакъны кёзюуюнде ОНФ-ны ара штабыны членлери, «Волонтёры Победы» деген Бютеуэресей къозгъалыуну председатели Ольга Амельченкова бла «Российский союз сельской молодежи» деген Бютеуэресей джаш тёлю джамагъат бирлешликни председатели Юлия Оглоблина Конституциягъа джаш тёлю бла байламлы тюрлениуле этилселе деген оюмну билдиргендиле.
«Конституция джазылгъан заманда, 90-чы джыллада, кеси разылыгъы бла джамагъат ишлеге къошулгъан деген болмагъанды. Ол заманда къой, мен 2009-чу джыл волонтёр ишге биринчи кере къошулгъанымда, бизге киши ийнанмай эди, кёлтюргючлюк, болушлукъ да табмай эдик. Бюгюнлюкде болум тюрленнгенди, волонтёр иш бла кёбле кюрешедиле. Бизни къозгъалыуну къурамында эм уллу волонтёргъа 96 джыл болгъанды, ол Уллу Ата джурт къазауатха къошулгъан тиширыуду. Башхача айтсакъ, волонтёр иш бюгюнлюкде бизни джамагъатны ара багъанасыды. Биз оюм этгенден, Конституцияны 114-чю статьясына къошакъ этерге керекди. Ол РФ-ны Правительствосуна волонтёр къозгъалыугъа болушлукъ этерге мадар берликди», - дегенди Ольга Амельченкова.
Владимир Путин аны айтханына разы болгъанын билдире: «Тюзсюз, ол джыллада быллай ишлени юслеринден сагъыш киши этмей эди. Не джашырыу, ол не зат болгъанын толу ангылаялгъан да болмаз эдик. Бюгюнлюкде уа ол керти керекли, магъаналы ишди», - дегенди.
«Владимир Владимирович, боллукъ эсе, джаш тёлю бла байламлы мени да бир къошарым бар эди. Бюгюнлюкде, Росстатны билдиргенине кёре, бизни къралны джамагъатыны 25 проценти 14-ден 35 джылгъа дери джаш адамладыла. Алай а Конституцияда джаш тёлю политиканы хакъындан джукъ джокъду. Ол а бизни джашауубузда терен орунлу болуб баргъан ишди. 78 субъект кеслеринде законла джарашдыргъандыла. Къралыбызны джаш тёлю джамагъат бирлешликлерини атларындан тилегим: Конституциягъа джаш тёлю политиканы хакъындан къошакъ этилсин. Аны борчу ёсюб келген джаш адамлагъа, сохта кюнлеринден башлаб, болушлукъ этерге, фахмуланы, билимлилени ачыкъларгъады. Сиз бизни айтханыбызгъа разы болуб, болушлукъ этерсиз, деб ышанабыз», - деб къошханды Юлия Оглоблина.
Эресей Федерацияны Президенти анга: «Разыма. Мен сизни оюмугъузну тюзге санайма. Ол джаны бла, сиз айтханны барын да эсге ала, ишлербиз», - деб, сёз бергенди.
ХУБИЙЛАНЫ Фатима.
