Хурметли джердешле!
Ата джуртну Къоруулаучуну кюню бла сизни таза джюрекден алгъышлайбыз!
Бу байрам бизни джашауубузгъа Эресейни аскер махтаууну кюнюча киргенди. Ауур сынам тюшген джыллада туугъан джерлерин джауладан сакълагъан, аны азатлыгъы, эркинлиги ючюн кюрешген аскерчилени кёб тёлюлерини джигитликлери халкъны эсинде ёмюрлюкге къаллыкъдыла.

Туугъан Джуртубузну эм ачы, эм къыйын кёзюуюнде – Уллу Ата джурт къазауатны джылларында – Хорламны джууукълашдыргъанланы биринчи алгъышларгъа излейбиз. Къарачай-Черкесияны адамлары да ичлеринде болуб, къралыбызны ётгюр уланлары талай кюннге бирси къралланы теблеб ётген фашизм деген халек «машинаны» джюрюшюн тохтатхандыла.
Бу байрамда алгъы бурун эркишилени алгъышларгъа ёчбюз. Алай а Джуртну сакълагъан сагъатда тиширыуланы ётгюрлюклери аладан кем болмагъанды. Къазауатны джылларында ала къуру тылда ишлеген бла къалмагъандыла. Кёб тиширыу айтдыргъандыла атларын – лётчик, зенитчик, снайпер, медсестра, партизан къызла. Ала бары да керти джигитликни юлгюсюн кёргюзгендиле, Джуртха кертиликни танытхандыла.
Уллу Ата джурт къазауатны, бирси урушланы, аскер къуллукъну сыйлы ветеранлары, аны кибик бюгюнлюкде Эресейни къоруулау кючюн бегитгенле, къоркъуусузлугъун баджаргъанла! Къралны бирлигин, аны тынчлыгъын сакълаугъа къошхан юлюшюгюзню багъасын билебиз. Джуртха къуллукъ этиб ёмюрлерин ашыргъан джити, ётлю адамлагъа сый беребиз!
Барыгъызгъа да сюек саулукъ, эсенлик, уллу насыб теджейбиз! Къарачай-Черкесияда, бютеу Эресей къралыбызда тынчлыкъ, рахатлыкъ болсун!