Элия (июль) айны 28-ден 30-на дери А. Бакулев атлы Миллет медицина тинтиу аралыкъны джюрекге къарагъан бёлюмюню хирурглары Къарачай-Черкесияны ара шахарында клиника больницада ишлегендиле.
Сынамлы устала джюрек аурууладан бек инджилген джердешлерибизге къарагъандыла, технология джетишимлени кючлери бла алагъа себеблик этерге да кюрешгендиле.

Бизни республиканы хирурглары бла бирге къонакъ врачла инфаркт болургъа джетиб тургъан джердешибизге «Аортокоронарное шунтирование» этгендиле. Заманы не азда озса джарамагъан операцияны хирургла, бусагъатхы методикаланы хайырландырыб, ауругъанны кёкюрегин да алай уллу джармагъанлай бардыргъандыла.
А. Бакулев атлы Миллет медицина тинтиу аралыкъны джюрекге къарагъан бёлюмюню хирурглары КъЧР-ни саулукъ сакълау министри Шаманланы Казим бла эмда бизни республикада къан тамырланы бакъгъан аралыкъны тамадасы Темрезланы Марат бла да тюбешгендиле.
Тюбешиуде саулукъ сакълауну усталары бизни регионда тыйыншлы медицина болушлукъ этиуню, туугъан кюнлеринден огъуна джюреклеринде къыяулары болгъан сабийлеге хирургия болушлукъ этиуню юсюнден сёлешгендиле.
Джергили хирургла къонакълагъа джюреклери ауругъанлагъа къаллай операцияла этгенлерини юсюнден хапар айтхандыла. Ол джаны бла уллу сынамлары болгъан устала да, Къарачай-Черкесияны кардиохирургия къуллугъуну ишин джаратханларын черте, аны мындан ары да ёсдюрюрге джарарыкъ затлагъа юретгендиле.

БАЙРАМКЪУЛЛАНЫ Зульфия.