«Бирикген Эресей» партия РФ-ны Президенти Владимир Путиннге КъЧР-ни Башчысы къуллукъгъа Темрезланы Рашидни теджерикди.

Аны юсюнден журналистлеге РФ-ны Федерал Джыйылыууну Федерация Советини вице-спикери, партияны Баш советини секретары Андрей Турчак айтханды.


«Къарачай-Черкес Республиканы бусагъатда Башчысы Темрезланы Рашидни кандидатурасы теджелликди. Ол 10 джылны ичинде республиканы айнытыу бла, адамланы джашау дараджаларын ёсдюрюу бла байламлы ишлени бет джарыкълы баджарыб тургъанды. Темрез улуну бирикген командасы барды. Биз оюм этгенден, ол джангыдан республикагъа Башчы болса, Къарачай-Черкесиягъа, анда джашагъан адамлагъа да джараулу кёб зат этерикди», - дегенди Андрей Турчак.
Аны бла бирге Дагъыстан Республиканы Башчысы къуллукъгъа Сергей Меликовну, Терк Башы Тегейни Башчысына да Сергей Меняйлону кандидатуралары теджелликди.
Къыркъаууз (сентябрь) айны 19-да, Сайлауланы бирикген кюнюнде, Эресейни 12 регионунда башчыла сайланныкъдыла. Хабаровский крайда, Мордовияда, Пенза областда, Тыва Республикада, Белгород, Уляновск, Тула, Тверь областлада, Чечен Республикада башчыланы джамагъат сайларыкъды. Дагъыстан, Къарачай-Черкес, Терк Башы Тегей республикалада чёб атыу регионал Парламентледе ётерикди.

 
{jcomments}