Хурметли джердешле!
36 джылны мындан алда Чернобыль атом электростанцияда аварияны ачы хапары дунияны къалтыратхан эди. Ол палах кёб адамны джашауун юзгенди, кёблени саулукъларын къурутханды, табигъатха эмда экономикагъа уллу къоранч келтиргенди.
Ол къыйынлыкъны уллулугъуна бюгюн толу багъа берген къыйынды. Къутхарыучула аллай джигитлик танытмасала, башхала ючюн джанларын-къанларын аямай кюрешмеселе, дуниягъа андан да кёб халеклик джетерик эди. Ала, ёлюм къоркъуудан артха турмай, борчларын сый бла толтургъандыла. Керти джигитле бюгюн да арабыздадыла.
Къралны джер-джеринден Чернобыль атом электростанциягъа баргъан къутхарыучуланы 1200-сю Къарачай-Черкесияны келечилери эдиле. Уллу басымы-тёзюмю, эркишилиги болгъан, башхала ючюн деб джанын аямай кюрешиб, кесибизникиле бла къалмай хоншу европа къралладан да кёблени XX-чы ёмюрню эм уллу техноген палахланы бирини ууундан къутхаргъан адамладыла ала.
Ай медет, аладан кёбле бюгюн кюннге джетмедиле – ауруу джашаудан замансыз айыргъанды. Ол ётгюр, халал адамларыбызны атларын ёмюрде унутурукъ тюлбюз.
Бу бушуу кюнде Чернобылде болгъан къутхарыучулагъа разылыгъыбызны билдиребиз. Биз барыбыз да аланы алларында борчлубуз. Ёлгенлени джатхан джерлери джумушакъ болсун. Бюгюн башлары саулагъа да уллу сый беребиз. Сизни этген джигитлигигиз унутуллукъ тюлдю. Джердешлерибизни барына да саулукъ-эсенлик, ашхылыкъла теджейбиз. Джашаугъа иги умут бла къарагъанлай туругъуз, узакъ ёмюрлю болугъуз!
Къарачай-Черкес Республиканы Башчысы
Темрезланы Рашид
Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.
