КъЧР къуралгъанлы быйыл башил (январь) айны 12-де 100 джыл толду. Республиканы джамагъаты КъЧР-ни 100-джыллыкъ юбилейин къууанч халда байрамларгъа деб тура эди, алай а коронавирус алкъын сериуюн болмагъанды, анда-санда дегенча, андан ачыгъанла алкъын тюбер ючюн къалмайдыла. Аны ючюн республиканы 100-джыллыкъ юбилейин байрамлау кюнню бир кесек кечирекге – быйыл къыркъаууз (сентябрь) айына дери созгъандыла.


Бюгюнлюкде КъЧР-ни 100-джыллыкъ юбилейи эсибизде къалырча республиканы джамагъаты джыйылыб арттотур (апрель) айны 23-де Красногорка стансе бла Сары-Тюз элни араларында бир мийик тюз къабыргъагъа 3000 нарат терекчикни орнатды. Аны да алай бош орнатыб къоймады, «КъЧР-ге 100 джыл» деб къабыргъада джазыб, джазылгъанны ызы бла орнатдыла тереклени.
Къабыргъаны мийиклиги 100 метр чакълы бирди. Узунлугъу да 200 метрден аслам тюл эсе, аз тюлдю. Бютеулей да нарат терекчикле 2 гектар джерни алгъандыла. Терекчикле ёсюб бир кесек уллуракъ болсала, Къарачай шахаргъа баргъанла, андан келгенле «КъЧР-ге 100 джыл» деген джазыуну кёрюб турлукъдула.
Нарат терекчиклени орнатыугъа республиканы джамагъаты эртдеден бери хазырланыб тургъаны себебли, арттотур (апрель) айны 23-де адамла танг атмай джыйыла башлагъан эдиле. Хар къауум кесине берилген иш бла кюрешиб башлагъан эди. Ким къалайда ишлеригин, ненча терекчик орнатырын белгилей, ишге хазырлана тургъанлай, КъЧР-ни Башчысы Темрезланы Рашид, КъЧР-ни Халкъ Джыйылыууну (Парламентини) Председатели Александр Иванов, КъЧР-ни Правительствосуну Председатели Мурат Аргунов, министерстволаны джууаблы къуллукъчулары келгенлеринде, джамагъат алагъа джылы халда тюбеди.
Нарат терекчиклени орнатыуну аллы бла КъЧР-ни Башчысы Темрезланы Рашид:
- Белгилисича КъЧР къуралгъанлы 100 джыл толду. Кесини 100-джыллыкъ ёмюрюнде республикабыз ёсюмню джолу бла бара, бюгюнлюкде эм алчы республикаланы бири болгъанды. Промышленносту, эл мюлкю бюгюннгю заманны излемине толусу бла келишедиле. 10-15 джылны мындан алда республикадан кетиб, ызына къайтыб келген адам эллерибизни, шахарларыбызны таныялмай къалыргъа боллукъду. Республикабыз джашнауну джолу бла барады. Мындан ары да биз аны джашнатыргъа, джамагъатны джашауун игилендирирге кюрешиб турлукъбуз..
Бюгюн барыбыз да былайгъа нек джыйылгъаныбызны билесиз: ма бу сейирлик талада, КъЧР-ни 100-джыллыкъ юбилейине атаб, 3000 нарат терекчикни орнатырыкъбыз. Республиканы джамагъаты урунууну сюйген джамагъат болгъаны хакъды. Бу огъурлу ишни тындырыргъа барыгъыз да бирден ёрге туруб келгенсиз. Сау болугъуз, КъЧР-ни 100-джыллыкъ юбилейи эсибизде къалырча, кёзюбюзге кёрюнюб турурча огъурлу ишге къошулгъаныгъызгъа. Кесибизни джигерлигибиз бла ёсюб келген джаш тёлюге бюгюн биз юлгю кёргюзе турабыз. Биз кесибизни джашауубузда ашхы ыз къояргъа керекбиз. Бюгюн нарат терекчиклени биз орната эсек, ала ёсюб джетселе энди келлик джаш тёлюню эсине бизни салгъанлай турлукъдула. Огъур бла тамырлансынла бюгюн джамагъат орнатхан терекчикле, - деди.
КъЧР-ни Башчысы сёзюн бошагъандан сора алайгъа джыйылгъан джамагъат, бютеулей да 1500-дан аслам адам, къауум-къауумгъа юлешиниб, терекчиклени орнатыу ишни къолгъа алды.
Башында айтханыбызча, нарат терекчикле бир да ариу къабыргъада орнатылгъандыла. Алагъа малдан, адамдан заран джетмезча къабыргъаны тёгерегине темир чыбыкъ тартылгъанды. Айтыугъа кёре, терекчикле ёсген джерге къарауул да салынныкъды. Мылылыкъ джетмей, терекчикле къуу болуб къалмаз ючюн, башына уллу бёчкелени чыгъарыб, керек заманда суу салыб да турлукъдула.
3000 нарат терекчикни орнатхан ауур, джууаблы иш эди да, адамла талай сагъатны ишлеб, арысала да, бетлеринде къууанч сезимлери таныла, юйлерине чачылышдыла…

Къобанланы Махмут.

 
{jcomments}