Багъалы джердешле! Къарачай халкъны джангырыууну кюню бла барыгъызны да таза джюрекден алгъышлайбыз!
«Джуртха джол ачылады» деген сюйюмчю хапарны эшитгинчи къарачайлыла 14 джылны сюргюнде сынагъан ачы къыйынлыкъланы эсге тюшюрмей бу байрамны юсюнден сёлеширге мадар джокъду.
Ол тамам 65 джылны мындан алда – 1957-чи джылны хычаман (май) айында - эди. Уллу тёлюню ол кюнню джууукълашдырыб кюрешген адамларыны алларында баш иебиз. Уллу Ата джурт къазауатны фронтларында, тылда аланы джигитликлери, Орта Азия бла Къазахстанны тюзлеринде урунуу хорламлары, миллетни реабилитациясы ючюн арымай-талмай кюрешгенлери – ол затла болгъандыла туугъан джуртха къайтыргъа мадар берген.
Мында аякъ юсюне турургъа миллетге талай джыл керек эди. Къарачай-Черкесияны кёб тилли халкъыны болушлугъу да себеб болгъанды тыйгъычланы хорларгъа. Кёб тюрлю сынамладан ётюб, ёз джуртуна джыйылгъан къарачайлыла регионну социал эмда экономика ёсюмюне танг юлюш къошхандыла. Неден да бек чертиб айтыргъа тыйыншлысы уа ол къадар къыйынлыкъ кёргенинде да миллет бетин, маданият энчилигин сакълаялгъаныды, тин хазнасын, тилин, адетлерин, миллет деб айтдыргъан затларын ёсюб келген тёлюлеге берелгениди.
Сыйлы джердешле! Бу байрам кюнде сизге насыб, саулукъ-эсенлик теджейбиз. Юйлеригизден берекет, джылыу къурумасынла! Джашасын, джашнасын Ата джуртубуз!
Къарачай-Черкес Республиканы Башчысы
Темрезланы Рашид
Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.
