Огъур бла келсин Джангы джыл! Хар арбазгъа, хар тийреге, хар элге, хар шахаргъа ашхылыкъ, рахатлыкъ келтирсин! Бютеу палахла кетген джылда къалсынла! Джангы джыл бла сау дуниягъа рахатлыкъ, эсенлик келсин!
Аллах бизни къартсыз этмесин! Хар къайда да джаш тёлюбюз Аллах бла сакълансын, адети бла, намысы бла эслеб атласын!

Тау намысны сакъласынла къызларыбыз, батыр, ётгюр болсунла джашларыбыз! Таза джюрекли адамларыбыз кёб болсунла, хар заманда миллетибизни сыйын мийикде тутсунла! Минги Тауну башында акъ къарлача, кёк бузлача, ахлуларыбызны иннетлери таза болсунла. Кюнден кюннге халкъыбызны адам саны ёссюн, адети, намысы сакълансын ! Бу джашауда не ашхылыкъ сакълай эсегиз да, джангы джылда ол сизге берилсин! Къобан суу тенгизге джетген кибик, Аллах муратларыгъызгъа джетдирсин! Ата джюрек къыйналмай, ана кёз джыламай, эгечле джарсымай, къарнашла башларын энгишге иймей джашарча Аллах этсин! Къартла, балала, ата-анала, къарнашла, эгечле, кюёуле, келинле, хоншула, элчиле келир бу заманнга да къууанч бла, чырмаусуз-чарпыусуз, ойнай-кюле джетсинле!
Аллах ёлгенлерибизни унутур ачыу сынатмасын. Тар къабырлары джарыкъ-кенг болсун, шапагъатчыла болуб, Аллахны рахматын табыб, джандетге кирсинле! Сауларыбызгъа Аллах сюек саулукъ берсин, ачлыкъ-джаланнгачлыкъ, ауруу-джарсыу сынатмай келир джылгъа сау-эсен Аллах джетдирсин! Джашау джолубуз узун болсун, джарыкъ болсун! Аллах тилеклерибизни къабыл этсин!

 
{jcomments}