Мындан алда «Газпром межрегионгаз» ООО-ну баш директору Сергей Густовну башчылыгъы бла ол ведомствону Къарачай-Черкесияны джамагъатын табигъат газ бла баджарыугъа аталгъан уллу кенгеши бардырылгъанды.
Анга Къарачай-Черкесияны Башчысы Темрезланы Рашид бла «Газпром» ПАО-ну РФ-ны власть органлары бла байламлылыкъ джюрютген департаментини тамадасыны орунбасары Арсен Гаглоев да къошулгъандыла.
Кенгешде Къарачай-Черкесияны джамагъатын газ бла баджарыргъа деб, 2021-чи – 2025-чи джыллагъа салыннган планны толтурууну, газны джердешлерибизни арбазларына дери хакъсыз тартыуну, хайырландырылгъан газны багъасын тёлеуню юсюнден сёлешиннгенди.
Анда айтылгъаннга кёре, Къарачай-Черкесияда табигъат газ бла 118 минг юй бла 2 минг организация хайырланады. Сан бири болмаса, ала бары да хайырландыргъан газларыны багъасын заманында тёлейдиле. Газгъа хакъ тёлеуню кёргюзюмю 100 процентге джетгени бла Къарачай-Черкесия Шимал Кавказ федерал округну алчысы болуб турады.
Бусагъатда «Газпром» Къарачай-Черкес Республикада «Программа развития газоснабжения и газификации», «Программа социальной газификации» «Газпром - детям» деген юч уллу социал магъаналы проектни толтурады.
«Газпром - детям» деген социал программаны тамалында бизни республикада бир талай спорт объект ишленнгенди.
«Программа развития газоснабжения и газификации» деген проектге да Къарачай-Черкесия 2008-чи джыл къошулгъанды. Андан бери аны тамалында белгиленнген ишле тири бардырылгъанларыны себебинден, Къарачай-Черкесияда газ бла баджарылгъан юйле 83,7 процентге джетгендиле. Ол кёргюзюм бютеу Эресейде 72,2 процентди.
«Газпром межрегионгаз» ООО-ну баш директору Сергей Густов айтхандан, Къарачай-Черкесияны бютеу джамагъаты табигъат газ бла 2026-чы джылгъа дери баджарыллыкъды.
Алай этилгени Къарачай-Черкесияны турист кластерине ёсюм алдырыргъа да джарарыкъды.
2022-чи джыл абыстол (ноябрь) айны 30-да Къарачай-Черкесияны Башчысы Темрезланы Рашид республиканы Правительствосу «Газпром» ПАО бла бирге хазырлагъан «Программа развития газоснабжения и газификации Карачаево-Черкесской Республики на период 2021-2025 гг.» деген проектни бегитгенди. Аны тамалында бизни республиканы 25 элине табигъат газ тартыллыкъды. Алада джашагъан 23 минг адам да «джашил от» бла хайырланыб тебрерикди.
Бюгюнлюкге салыннган план бла 91 элде 3053 юйге газ тартыллыкъды.
РФ-ны Президенти Владимир Путинни излеми бла джамагъатны социал халда газ бла баджарыугъа аталгъан программа бизни республикада тири толтурулады.
Кенгешни ахырында ол программаны толтуруу бла Къарачай-Черкесия Эресейни регионларыны рейтингинде 7-чи орунну алгъаны айтылыб, ол ишге юлюш къошхан адамлагъа бизни республикада газ къуллукъ къуралгъанына 60 джыл толгъаны бла байламлы кърал саугъала берилгендиле.
Алайда КъЧР-ни Башчысы Темрезланы Рашид «Газпром межрегионгаз» ООО-ну баш директору Сергей Густовну «За заслуги перед Карачаево-Черкесской Республикой» деген орден бла саугъалагъанды.
«Газпром» ПАО-ну РФ-ны власть органлары бла байламлылыкъ джюрютген департаментини тамадасыны орунбасары Арсен Гаглоевге да «Заслуженный работник промышленности Карачаево-Черкесской Республики» деген сыйлы атны атагъанды.
