Хурметли аскерчиле-интернационалистле, афган къазауатны ветеранлары, Къарачай-Черкесияны джамагъаты!

Ата джуртубуздан тышында аскер борчларын толтургъан эресейчилени эсгериуню кюню Эресейни тарих бетлеринде ёмюрлюкге сакъланныкъ магъаналы кюнлени бириди.
1989-чу джыл байрым (февраль) айны 15-де совет аскерле къанлы урушла бардырылгъан Афганистандан чыгъарылгъандыла. Анда 10 джыл бардырылгъан къазауатда къралыбызны сыйын сакълай, аны излемлерин джакълай, джигитликле эте, 14 минг эресейчи ёлгенди. Аланы араларында Къарачай-Черкесияны да 42 уланы болгъанды. Ол сыйлы джердешлерибизни атлары, Ата джуртну аллында сыйлы борчларын мийик дараджада толтургъан джигитлеча, тарихибизде сакъланныкъдыла. Аланы ол дуниялары джарыкъ болсун.
Бюгюнлюкде кеслерини юлгюлеринде ёсюб келген тёлюлени патриот ангыларын бегитиуге уллу юлюш къошхан аскерчи ветеранларыбыз болгъанларына да къууанабыз. Спецоперация бардырылгъан, бютеу адам улугъа багъалы затла джакъланнган кёзюуде аны магъанасы бек уллуду.
Къарачай-Черкесияны кёб миллетли джамагъаты Ата джуртну къоруулагъан джигитлери бла ёхтемленеди, алагъа уллу сый береди.
Багъалы джердешлерибиз! Ата джуртубуздан тышында аскер борчларын толтургъан эресейчилени эсгериуню кюнюнде барынга да сюек саулукъ, рахат джашау теджейбиз. Бусагъатда къралыбызны рахатлыгъын сакълай, адамланы къоркъуусузлукъларын бегите тургъан джигитле юйдегилерине сау-эсен къайтсынла, дейбиз.

Къарачай-Черкес Республиканы Башчысы
Темрезланы Рашид

Къарачай-Черкес Республиканы Халкъ
Джыйылыууну (Парламентини) Председатели
Иванов Александр
Къарачай-Черкес Республиканы
Правительствосуну Председатели
АРГУНОВ Мурат.