2018-чи джылдан бери КъЧР-ни школларында «Бирикген Эресей» партияны «Парта героя» деген патриот проекти толтурулады.
Школлада бардырылгъан къоруулау-кёбчюлюк айны тамалында кёб болмай Тёбен Теберди элни орта школунда Эресейни Джигити, генерал-майор, 1976-чы джыл ол школну тауусхан Боташланы Хусейни джашы Къанаматны партасы ачылды.
«Джигитни партасын» ачыугъа аталгъан джыйылыугъа Къарачай районну администрациясыны къуллукъчулары, школну сохталары бла устазлары, джамагъат къуллукъчула дагъыда башхала къошулгъан эдиле.
Тёбен Тебердини школунда джангы окъуу джыл да Боташланы Къанаматха мемориал къанга ачыугъа аталгъан митинг бла башланнган эди. Андан сора да школда «Разговоры о важном» дерсле, спецоперациягъа къошулгъанлагъа аталгъан конкурсла, сабийлени аскер-патриот ангыларын ёсдюрюрге джораланнган ишле бардырылгъанлай тургъандыла.
Джигитни партасыны джанында иги окъугъан, джамагъат ишлеге тири къошулгъан сохта олтурургъа тыйыншлыды, кеси да ары олтурурну аллы бла ант этерге керекди.
Школну директору Семенланы Фатима кесини сёзюнде Боташланы Къанаматны аты унутулмасын деб устазла бла сохтала кёб иш бардыргъанларыны юсюнден айтды.
- Джигит бизни школда окъугъаны бла ёхтемленебиз. Ол бизни кёб затха учундурады. Нек десегиз, Боташ улу джашауну уллу джолуна бизни школдан чыкъгъанды. Бюгюнлюкде сабийлерибизни аны юлгюсюнде ёсдюребиз… - деди Семенланы Фатима.
Джыйылыугъа къошулгъанланы арасында Джёгетей Аягъы райондан келген къонакъла да бар эдиле – Джёгетей Аягъында 7-чи номерли лицейни директору Чомаланы Зухра, МВД-ны ветеранларыны район советини председатели Орусланы Умар, аны орунбасары Анатолий Фетисов.
- Теберди ёзенден Ата джуртубузгъа сый-махтау келтирген кёб белгили адам чыкъгъанды. Аланы арасында Ата джурт къазауатны джигитлери, алимле, устазла, джазыучула дагъыда башхала. Бюгюннгю джыйылыу ёсюб келген тёлюлени эслеринде Эресейни Джигити Боташланы Къанаматны аты ёмюрлюкге сакъланыр деген умут бла бардырылады. Биз да кесибизни лицейде Боташ улуну партасын ачаргъа деб турабыз. Ол себебден, Джигитни школуна келгенибизни уллу магъанасы болгъаннга санайма, - деди Джёгетей Аягъы шахарны 7-чи номерли лицейини директору Чомаланы Зухра.
Джыйылыуда Къарачай районну окъуу бёлюмюню тамадасы Хатууланы Зурида, «Къарачай – алан халкъ» джамагъат бирлешликни район бёлюмюню председатели Къочхарланы Джашарбек, Тёбен Теберди элде къартланы советини башчысы Къочхарланы Рашид, Къанаматны тамада къарнашы Боташланы Марат да сёлешдиле. Ала барысы да школда «Джигитни партасы» ачылгъаныны магъанасы уллу болгъанын чертиб сёлешдиле.
КъЧР-ни махтаулу устазы, школну къарачай тилден устазы Къочхарланы Халимат, джыйылгъан джамагъатны аллында сёлеше, Боташланы Къанаматха атаб джазгъан назмусун да окъуду.
Ызы бла Къочхарланы Джашарбек бла Боташланы Марат Эресейни Джигитини партасын ачдыла. Ол партаны джанында олтурургъа айырмагъа окъугъан, школну джамагъат джашаууна тири къошулгъан, 11-чи классны сохтасы Биджиланы Аминатха эркинлик берилди. Аминат да: «Ата джуртубузну ёлген джигитлерине сый бере, нёгерлерими аллында Эресейни патриоту болургъа, иги окъургъа ант этеме», - деди.
Джыйылыуну ахырында Джёгетей Аягъы шахарны 7-чи номерли лицейини музыкадан устазы Байрамукъланы Аминат спецоперацияда ёлген джигитлеге аталгъан джырны джырлады.
САЛПАГЪАРЛАНЫ Умар.
