Къарачай-Черкесияны ариу джерлерини суратлары РФ-ны Федерал Джыйылыууну Федерация Советини кёрмючюне къошулгъандыла.

РФ-ны Федерал Джыйылыууну Федерация Совети къралыбызны табигъат байлыгъын бютеу джамагъатха кёргюзюр мурат бла бардырылгъан «Первозданная Россия» деген Бютеуэресей фестивалны 10-джыллыкъ юбилейине атаб кёрмюч ачханды. Анга Къарачай-Черкесияны тамаша джерлерини суратлары да къошулгъандыла.
«КъЧР-ни сейирлик джерлерини суратлары ол кёрмючге къошулгъанларын ушатханбыз. Теберди миллет паркны тауларыны, сууларыны суратларын «Первозданная Россия» деген экспозициягъа талай джылдан бери да къошуб тургъанбыз. Кавказны кюнбатыш джанында джашагъан джугъутурла уа Эресейни табигъат белгиси болгъандыла»,– дейди РФ-ны Федерал Джыйылыууну Федерация Советини сенатору Салпагъарланы Ахмат.
Ол айтхандан, Эресейни регионларыны табигъат байлыкълары тюшюрюлген суратла бирге джыйылгъандыла. Сенаторлагъа хар региондан экини кёргюзгендиле. Аланы араларында КъЧР-ни айтхылы джерлерини суратлары да болгъандыла.
Федерал Джыйылыуну Федерация Советини председатели Валентина Матвиенко айтхандан, ол суратлагъа къарагъан адамла бютеу заповедникледен хапарлы боллукъдула.
«Ол ариу джерлени барына да айланыб чыгъаргъа бютеу джашауунг да джетерик тюлдю. Бизни къралыбызда къуру миллет паркла огъуна онла бла саналадыла. «Первозданная Россия» деген фестиваль юйлеринден чыкъмагъан адамлагъа Эресейни ариу джерлерин кёргюзюр мурат бла къуралгъанды», - дейди Валентина Матвиенко.
Байрам (февраль) айны 17-ден сора Эресейни джер-джеринден суратла къошулгъан джангы экспозициягъа Джангы Третьяковкада къараргъа боллукъду.

СОЛТАНЛАНЫ З.

 
{jcomments}