Къарачай-Черкесияда «Тепло для героя» деген акция тири бардырылады. Ол сууукъ кёзюуде аскерчилени джылы кийимле бла баджарыр мурат бла къуралгъанды.

Ма бу кюнледе «Бирикген Эресей» политика партияны регионал бёлюмю бла Шимал Кавказ кърал академия сууукъну иймеген, артыкъ исси этмеген 600 юс кийим, 400 къулакъланы, боюнну джабхан бёрк, 100 пара чындай джибергендиле.
Ала джылы кийимлени аскерчи эмда мобилизациягъа тюшген джердешлерибизге джоралагъандыла. Ашырылгъан кийимлени бир кесеги 334-чю тау моторлу мараб атыучу бригаданы аскерчилерине, къалгъаны да КъЧР-ден мобилизация бла ашырылыб, кесича къуралгъан 100-чю бригаданы къурамында аскер къуллукъ этген джашлагъа юлешинникдиле.
Хар аскерчиге джылы кийимле бла бирге джюрегин къууандырырча джылы джазылгъан письмо да берилликди.
«Аскерчилеге джылы кийимлени Шимал Кавказ кърал академияны Дизайн бла лингвистика факультетини студентлери бла устазлары тикгендиле. Аллай кёб затны бирден хазыр этер ючюн, студентле хар нени тигиб кёрюучю лабораторияда керекле салыннгандыла, тюрлю-тюрлю размерлени макетлери белгиленнгендиле.
ШККъА-ны устазлары бла студентлери быллай сууаблыкъ акциялагъа къошулгъанлай турадыла. 2022-чи джылны джайындан бери медик студентле кеси разылыкълары бла Ростовда госпиталгъа ишлерге барыб, анда врачлагъа аскерчилени багъаргъа болушадыла», - дейди «Бирикген Эресей» политика партияны регионал бёлюмю толтуруучу комитетини тамадасы Джамбаланы Руслан.
«Тепло для героев» деген акция бютеу къралда бардырылады. Ол Ата джуртну къоруулаучуну кюнюне аталгъанды. Акцияны тамалында «Бирикген Эресей» политика партияны регионал бёлюмю джылы кийимлени, алгъышлау письмоланы аскерчилеге энтда да джиберликди.
Аскерчилеге ашырылгъан джюкге кесинден юлюш къайгъырыулу джердешлерибизни къайсы бири да къошаргъа боллукъду.
«Бирикген Эресей» политика партияны регионал бёлюмю бла Шимал Кавказ кърал академия аскерчиле бла бирге Донбассны джамагъатына да гуманитар джюкле ашыргъанлай турадыла.

БАЙРАМКЪУЛЛАНЫ Зульфия.

 
{jcomments}