Инаугурация уа былай баргъанды. Адыгея Республиканы Конституцион сюдюню председатели Тлехатук Аскер ант этдирирге
Кумпилов Муратны сахнагъа чакъырады. Ол аны эки кърал тилде - орус эмда адыгей тилледе - этеди. Андан сора Кумпилов Муратха властны белгилери - Адыгея Республиканы Конституциясыны тексти, Байрагъы эмда Герби - бериледиле.
Кумпилов Муратны АР-ге Башчыгъа сайланнганы эмда къуллукъ борчларын толтуруб тебрегени бла байламлы алгъышлаула айтыу башланадыла да, Къарачай-Черкесияны Башчысы Темрезланы Рашидге да сёз бериледи.
«Сиз хар заманда да туугъан республикагъыз бла аны джамагъатыны уллу патриотлары болуб тургъансыз, алайлай да къаласыз, - деб башлайды ол сёзюн. – Къралны Президенти Путин Владимир, аны кибик республиканы депутатлары, Сизни кандидатурагъызны джакълаб, Сизни ишигизге эмда адамларыгъызны излемлерине джууаблы кёзден къарай билгенигизге уллу багъа бергендиле.
Сизни ишигизни бардырыуда уллу профессионал болгъаныгъыз, сыйыгъыз, таркъая билмеген къураучулукъ тирилигигиз Адыгея Республиканы аллында тургъан борчланы джетишимли баджарыргъа, Сизни уллу эмда джууаблы къуллугъугъузну толтурууда бардыргъан ишигиз регионугъузну социал-экономика, тин-иннет кючюн бегитирге, адамларыгъызны джашау дараджаларын ёсдюрюрге къуллукъ этериклерине мен толу ийнанама.
Мурат Каральбиевич толтуруучу эмда закон чыгъарыучу властланы тамадаларыны школларын ётгенди, бюгюн а ол республиканы баш къуллугъуна сайланнганды. Къарнаш Адыгеяны джашаууну санагъатларыны барында да аны аты бла байламлы болгъан кёб тюрлю тюрлениу этиллигине мен чыртда ишек этмейме. Республиканы халкъыны джакълыгъы бла ышанмакълыгъы аны ишини тамалы боллукъларына да сёз джокъду».
Темрезланы Рашид Къарачай-Черкесия бла Адыгеяны араларында баргъан иш джюрютюуле бла къарнашлыкъ байламлылыкълагъа да уллу багъа бериб сёлешгенди.
Адыгея Республиканы джангы сайланнган Башчысы Кумпилов Муратны инаугурациясы бла байламлы бардырылгъан къууанчха АР-ни алгъыннгы президентлери Джаримов Аслан бла Тхакушинов Аслан, Абхазия Республиканы Президенти Хаджимба Рауль, Къабарты-Малкъар Республиканы Башчысы Коков Юрий, Ингушетияны Башчысы Евкуров Юнус-Бек, Краснодар крайны губернаторуну заместители Долуда Николай, Россия Федерацияны эл мюлк министрини биринчи заместители Хатуов Джамбулат, Адыгеяны кърал, джамагъат органларыны тамадалары бла республиканы депутатлары къошулгъандыла.
Къууанчда сёлешгенле Кумпилов Мурат, джаш адам болса да, толтуруучу, закон чыгъарыучу властланы тюрлю-тюрлю органларында ишлеб, уллу сынам джыйгъан, борчуна джууаблы кёзден къарагъан оюмлу башчы болгъанын чертиб сёлешгендиле. Анга республикасын социал-экономика, тин-иннет джаны бла ёсдюрюуде джангы джетишимле теджегендиле.
Кумпилов Мурат да республиканы Башчысыны къуллугъуна ышаныб теджегенлери ючюн Россия Федерацияны Президенти Путин Владимирге, «Бирикген Россия» партиягъа, Адыгеяны депутатларына джюрек разылыгъын билдириб сёлешди. Аланы ышанмакълыкъларын толтурур ючюн, джанын-къанын, билимин, сынамын аямай кюреширигин билдиргенди.
