Къарачай-Черкесияны Халкъ Джыйылыууну (Парламентини) Председатели А. Иванов, республиканы кеси оноуларын кеслери этген джергили органларын сайлау бла байламлы ётген чёб атыугъа баргъан сайлаулагъа багъа бере, аланы таза эмда конкуренция кюреш тамалда ётгенлерин чертгенди.  
«Сайлау участокланы барында да чёб атыула къараучула къараб тургъанлай баргъандыла. Чёб атыуну баргъаны да камерагъа алыныб тургъанды. Мен акъыл этгенден, бизни оппонентлерибиз сайлауланы ачыкъ ётгенлерине сёз табарыкъ тюлдюле. Кюреш а баргъанды,  аны къайсы бирибиз да мюкюл этебиз. Анда терс зат да джокъду.

Бизни партиябыз да аны излейди», - дегенди республиканы Парламентини Председатели, «Бирикген Россияны» регионал бёлюмюню секретары.
Ол айтхандан, Черкесскеде шахар дума къуралгъанды. Аны 33 мандаты барды да, аладан 23-сю «Бирикген Россияныкъыдыла». Ол шахар думаны къурамыны 70 процентиди. Сайлаулада чёб атыу тюз бармагъанды, деб, киши да тарыкъмагъанды.
Бу сайлаула, ары дери чёб атыу болуб, аны ызындан баргъандыла. «Бирикген Россия» депутатлагъа кандидатланы да алада хорлагъанланы теджегенди. Бу партия сайлаулада алай джетишимли да аны ючюн болгъанды. Бютеулей да КъЧР-ни 10 районунда ётгендиле сайлаула. Алагъа къошулгъанла 480 мандат ючюн кюрешгендиле. «Бирикген Россия» аладан 293 оруннга ие болгъанды.
Чёб атыу Черкесск шахарда артыкъ да джетишимли ётгенди. Айтханыбызча, анда мандатланы асламысына «Бирикген Россия» ие болгъанды. Джёгетей Аягъы шахар бла Къарачай шахарда да мандатланы 65-70 процентлери «Бирикген Россиягъа» джетгендиле.
Алай бла Биргелей чёб атыуну кюнюнде Къарачай-Черкесияда кеси оноуларын кеслери этген джергили органлагъа 51-чи кере чёб атыу болгъанды. Аны кёзюуюнде 168 сайлау участок ишлегенди.
Сентябрны 10-да Къарачай-Черкесияда Черкесск шахаргъа, Къарачай шахаргъа, Абаза муниципал районнга, 39 эл эмда шахар маталлы посёлокга келечилик органла сайланнгандыла.