Бу кюнледе Исправная станседе эркин тутушдан республиканы ачыкъ турнири бардырылгъанды. 

Ол иш Къарачай-Черкес Республиканы аскерчилерине, аскер къаугъа бардырылгъан джерде ёлгенлеге аталыб къуралгъанды. Эришиулеге 10 команда къошулгъанды.
Алайгъа баргъанланы арасында Зеленчук муниципал районну башчысы Александр Шайдаров, Исправная стансени администрациясыны тамадасы Александр Березовский, Эресейни МВД-ны Зеленчукде муниципалла арасы бёлюмюню Ветеранларыны эмда Джамагъат советини тамадасы Батчаланы Мухат, аскер къаугъагъа къошулгъан, Зеленчук эмда Уруп районланы аскер комиссариатыны тамада устасы Андрей Руденко, Эресейни МВД-ны Зеленчукде муниципалла арасы бёлюмюню Джамагъат советини къурамында болгъан, Эресейни спортуну эркин тутушдан устасы, Къарачай-Черкесияны махтаулу юретиучюсю Хубийланы Ахмат, башха кърал къуллукъчула бла белгили спортчула болгъандыла.
Хорлагъанлагъа, ёчлю орунланы алгъанлагъа саугъала, ёчле бергендиле. Бу спорт эришиулени Кипкеланы Албузну джашы Азрет къурагъанды.

Узеирланы Хусей.