Мындан алда Кърымшаухалланы Исламны музейинде «Литературная резиденция» проектни тамалында джазыучула бла окъуучуланы тюбешиулери болгъанды. Ары белгили джазыучула, редакторла, басма иш бла кюрешгенле джыйылгъандыла.

Ол тюбешиуде «Рипол» классик китаб басманы баш редактору Татьяна Соловьёва да болгъанды.
«Алайда джазыучула 20 кюнню ичинде кеслери таб, рахат болумда ишлегендиле. Ала окъуучула бла, регионал адабиятчыла бла чыгъармачылыкъ тюбешиуле бардыргъандыла. Аны тышында бу резиденцияда белгили джазыучуладан, редакторладан, басма иш бла кюрешгенледен болушлукъ, консультацияла алыргъа болум да къуралгъан эди. Быйыл «Литературная резиденция» проектни ишине къошулгъанланы арасында Санкт-Петербургдан поэт, прозаик, сабий джазыучу, «Сыскной пёс Пинчертон. Приключения в городском подземелье» деген китабны автору Людмила Ртищева «Тайна старого финского дома» деген китабын джазыб бошар муратлыды. Андан сора Дондагъы Ростовдан прозаик, журналист, талай китабны автору Михаил Малышев да болгъанды. Михаил джыйылыудан сора «Смерть, недорого» деген детектив романын джазар муратлыды», - дегендиле КъЧР-ни Маданият министерствосунда.
Алайгъа дагъыда Красноярскеден прозаик, поэт Женя Симакова, Ульяновскеден прозаик, поэт, сабий джазычу, Эресейни Джазыучуларыны союзуну Ульновскеде бёлюмюню тамадасыны орунбасары Илья Таранов, Санкт-Петербургдан прозаик, журналист Яна Титоренко баргъандыла.
Джыйылгъанла, тюбешиуню аягъында кеслерини чыгъармачылыкъ планларыны юслеринден хапар айтыб, бу джыйылыу алагъа джангы авторла бла танышыргъа, сынам алмашдырыргъа, билимлерин ёсдюрюрге мадар бергенин айтхандыла.