Кърал Кремль Къалада Къарачай-Черкесия бла Ингушетияны 25-джыллыкъларына аталыб уллу байрам концерт ётдю. Анга къараргъа 6 мингден аслам адам келген эди, аланы ичлеринде федерал власть органланы келечилери, Москвада ишлеген Къарачай-Черкесияны адамлары, студентле, миллет джамагъат организацияланы, творчество интеллигенцияны келечилери бар эдиле.
Официал джаны тамамланнгандан  сора, эки кавказ республиканы ариулугъун, къудуретин, хунерлигин суратлагъан уллу концерт башланды.

Эм алгъа Къарачай-Черкес Республиканы творчество коллективлери кёргюздюле кеслерини программаларын. Джыйылгъан миллет, «Апсаты» фольклор этнография ансамблни, «Эльбрус» кърал тепсеу ансамблни, солистле Фатима Китаеваны, Ачар Меремкуловну, Арсланбек Султанбековну, Ярослав Щеклановну, «Къарча» сабий тепсеу ансамблни, «Джёгетей» джырчы къауумну бек джаратханларын билдириб, кёб заманны харс уруб турдула.
Ингушетия да сахнагъа ол кюн кесини эм белгили ансамбллери бла артистлерин чыгъарды: «Ингушетия» кърал ансамблни, Хава Яндиевни, Лема Нальгиеваны, Тимур Дзейтовну, Рагда Ханиеваны.
Къарачай-Черкес Республиканы махтаулу артисти Дмитрий Маликов, байрамны сыйлы къонагъы болуб, Къарачай-Черкесиягъа аталгъан джырны джырлады. КъЧР-ни махтаулу артисткасы Сати Казанова, ингуш тилде джырлаб, бюсюреуге тыйыншлы болду. Джыйылгъанла концерт программаны бек джаратханларын, джюрек разылыкъларын да билдирдиле.

 
{jcomments}