Къыркъаууз айны 3 - Терроризмге къаршчы кюрешде бир иннетлиликни кюню
Эресейде эм ачыулу терроризм иш 2004-чю джыл къыркъаууз (сентябрь) айны 1-де Терк Башы Тегейни Беслан шахарыны биринчи номерли школунда болгъан эди. Андан бери тамам 20 джыл ётсе да, ол къыйынлыкъда адамларын тас этгенлени джюрек джаралары энтда да бителмегендиле. Ала бла бирге, мурдарланы къолларындан ёлгенлени эсгере, бютеу эресейчиле да къыйналадыла.
2004-чю джыл къыркъаууз (сентябрь) айны 1-де Бесланда Руслан Хучбаровну башчылыгъы бла террористле, джангы окъуу джылны башланнганына аталгъан къууанха къошулгъанланы школну спорт залына джыйыб, 3 кюнню зор бла ашсыз-суусуз тыйыб тургъан эдиле. 186 гюнахсыз сабий бла 17 устаз да ичлеринде болуб, ала 334 адамны ёлтюрген эдиле. Джюкге алыннган адамланы (заложниклени) къутхарабыз деб, къоркъуузлукъну сакълагъан эресейчи органланы къуллукъчуларындан да оноулан алайда аджалына тюбеген эди. Андан бери Бесланда школ азатланнган кюн, къыркъаууз (сентябрь) айны 3-сю, Терроризмге къаршчы кюрешде бир иннетлиликни кюню деб белгиленеди.
Хар джыл сайын ол кюн джетгенлей, биз джаш-къарт, уллу-гитче деб айырмагъан, аяусуз, хатерсиз, къанлы терроризм ишлени этгенлеге къаршчы болгъаныбызны билдиребиз. Кеслерини зулму умутларына джетер ючюн, гюнахсыз адамланы джашауларын юзген мурдарланы кечмезлигибизни, аладан сакъланыр ючюн, бир иннетни тутарыгъыбызны айтабыз.
Террористлени, мурдарланы миллетлери джокъду. Аланы джоллары къысхады, этген аманлыкълары башларына боллугъу хакъды. Бесланда терроризм ишни этгенле да къазаларын табхандыла. Эресейни къоркъуусузлугъун бегитген органлары аланы, хазна къалмай, барын да ол сагъатда огъуна къурутхан эдиле. Башхаланы да этген аманлыкълары башларына джетмей къаллыкъ тюлдю. Алай болуруна ышаннган, базгъан да этебиз. Эресейни джамагъатыны бирикмеклигине бусагъатха дери киши къатылалмагъанды, мындан ары да къатылаллыкъ тюлдю.
Кёб миллетли къралыбызны джамагъаты не уллу сынаудан да бирикгенини кючю бла ётюб келгенди. Уллу Ата джурт къазауатны кёзюуюнде да ата-бабаларыбыз, къарачай, орус деб, кишини айырмай, бир-бирлерине билек болгъанлары бла хорламлы болгъандыла. Бусагъатда аскер къаугъагъа къошулгъан джигитлерибиз да, миллетчилеге къаршчы кюрешни ма алай биригиб бардыргъанлары себебли онг болуб, «Бирликде – тирилик» болгъанын кёргюзедиле.
Мындан ары да власть бла джамагъат бириксе, не тюрлю палахдан да сакъланырыбызгъа ышанмакълыкъ уллуду.
БАЙРАМКЪУЛЛАНЫ Зульфия.
