Къарачай-Черкес Республика къуралгъанлы 25 джыл толгъанына аталыб, Черкесскеде джангы ишленнген «Юбилейный» спорт къаланы ачыу болду.
Ол ишге ШКФО-да Россияны Президентини Шимал Кавказ федерал округда Толу эркинликли келечиси, Россиячы Джигити Белавенцев Олег, РФ-ны Шимал Кавказны ишлерини юслеринден министри Кузнецов Лев, Къыбыла Тегей Республиканы Президенти Бибилов Анатолий, Ингуш Республиканы Башчысы Юнус-Бек Евкуров, КъМР-ни Башчысы Коков Юрий, Шимал Тегей-Алания Республиканы Башчысы Битаров Вячеслав, «Евроцемент груп» компанияны президенти Скороход Михаил, Россияны Спорт тутушдан федерациясыны президенти Мамиашвили Михаил, Ставрополь крайны губернатору Владимиров Владимир, Калмукъ Республиканы Башчысы Орлов Алексей, Кърым Республиканы Башчысы Аксёнов Сергей, Миллет ишлени хакъындан федерал агентствону тамадасы Баринов Игорь эмда башха къонакъла бла Черкесскени джамагъаты къошулгъандыла. Черкесскени «Джашил айрымкан» деген солуу бла культура паркында ишленнген джангы спорт къаланы ачылыуу къууанч халда, тюрлю-тюрлю школлада эмда регионну спорт секцияларында чыныкъгъан джаш адамланы спорт, тепсеу оюнлары бла башланды. Ол къууанчда, Белавенцев Олег: «Бюгюн КъЧР Россияны къурамында республика болуб тургъанлы 25 джыл болгъанын белгилеу байрам этеди джамагъат. Былайда, Черкесскени арасында «Джашил айрымканда» 5 минг квадрат метр юй тюбю, адамла джюзерча эки бассейни, тюрлю-тюрлю оюнла эмда спортчу командала эришиуле бардырырча заллары, фитнес бла кюреширге эмда сууда саулукъ бегитир мадарлары болурча джерлери болгъан физкультура-саулукъ сакълау комплекс ишленнгенди. Быллай аламат спорт комплекс бла республика да, федерал округ да, таб, къралыбыз да ёхтемленирге боллукъдула…» - деб башлады кесини алгъыш сёзюн.
РФ-ны Президентини ШКФО-да Толу эркинликли келечиси алайда айтхандан, ол комплекс федерал аралыкъ бла, республиканы башчылары биргелей джоюм этиб, ишленнгенди. Аны кибик комплексни къурулушуна «Евроцемент груп» компанияны меценатлары бла инвесторлары да уллу юлюш къошхандыла.
- Байрам кюнюгюзге быллай аламат саугъа эталгъаныгъыз, - деди Кузнецов Лев да, - бу спорт къаланы ачылыуу – сизни регионну социал-экономика болумну айныууна энтда бир уллу юлюш къошууду, уллу Россиябызны мындан да бек айнытыр мадар бериудю, былайыны джамагъатына, саулукълу миллет болурча, инвестиция этиудю… Андан ары сёзюнде РФ-ны Шимал Кавказны ишлерини юслеринден министрини айтханы республиканы джамагъатын бек къууандырды. Ол айтхандан, быйыл къачда, къралыбызны Правительствосу, Черкесскени ара стадионуна реконструкция этерге деб, ачха берирге оноу этгенди. Стадион да, джангы спорт къала да бир джерде спортну «ара багъанасын» къураргъа мадар берликди.
Андан сора КъЧР-ни Башчысы Темрезланы Рашид сёлешиб, республиканы джамагъатын да, къонакъланы да (ол мероприятиеде болгъанланы барын да) джылы алгъышлады эмда «Юбилейный» спорт къаланы ишлерге къошулгъанлагъа разылыгъын билдире, уллу бюсюреу этди.
- Быллай  аламат спорт къаланы ишлерге болушханыгъыз ючюн, Михаил Анатольевич, сизге да «Евроцемент груп»  компаниягъа да уллу бюсюреу этеме. «Евроцемент» бу джумуш бла тохтаб къалмай, мындан ары да башха уллу ишлеге да къошула, болуша турлугъуна ажымсыз болгъанымы айтыргъа излейме. Бу спорт комплексде чыныгъырыкъ джаш адамла дунияны, олимпия спорт оюнланы чемпионлары болурла, деб да ышанама» - деди.
Ол къууанч джыйылыугъа келген къонакълагъа хошкелди сёз айта, республиканы 25-джыллыкъ юбилей байрамы бла алгъышладыла Скороход Михаил бла Мамиашвили Михаил да. Мамиашвили алгъыш сёзюн бошай:  «… Хурметли шохла, бу къала боллукъ тюл эди, республикагъызны быллай болумлу Башчысы болмаса. Ол эди айтыр сёзюм», - деди.
«Ёсюб келген тёлюле спортха эс бёлюб, аны бла кюреширге ёч болсала, къралыбыз да ол заманда кючлю боллукъду, республикагъызда ол затха аслам эс бёлюннгени эслениб турады. Аны кибик, джыллары келген адамлагъа да къайгъырыу уллуду. Бюгюн спорт къаланы ачылгъаны джаш тёлюню ёсдюрюуде, мындан ары заманда, республикагъа джарагъанлай, ашхы къуллукъ этгенлей турлукъду, деб турабыз…» - деди Скороход Михаил да.
Ахырында къонакъла да, республиканы адамлары да объектни ичине кириб къарадыла. Хар неси да бусагъат заманны излеминдеча деменгили ишленнген, джюрекни къууандыргъан спорт къала, ариу джарашхан спорт залларын, бассейнлерин, башха бёлмелерин ачды келгенлеге. Аны ичинде бютеуроссия эмда дуния дараджада эришиулени да бардырыргъа боллукъду. Бу спорт къаланы ишлеу, Темрезланы Рашидни  башламчылыгъы бла 2013-чю джылдан бери баргъанды, кеси да кърал бла энчи бирлешликни кючю бла ишлениб бошалгъанды.
 
СОЗАРУКЪЛАНЫ Норий
 
{jcomments}