Эресейни Социал фондуну Къарачай-Черкес бёлюмюню тамадасы Аслан Озов, келир джылдан башлаб, ишлеген пенсионерле, страховой пенсияланы юсюнден федерал законда этилген тюрлениулеге кёре, ачха къошуллугъундан журналистлеге хапар айтханды. Бардырылгъан ушакъны газет окъуучулагъа теджейбиз.
— Белгилисича, Эресейни Президенти Владимир Путин, 2025-чи джылны аллындан башлаб, пенсиягъа чыгъыб тургъанлай ишлеген адамланы да, ишлемегенленикича, пенсияларын кёлтюрюрге кереклисини юсюнден законнга къол салгъанды.
— Аслан Анатольевич, Къарачай-Черкесияда ишлеген пенсионерлеге страховой пенсияларын кёлтюрюу къаллай джорукъ бла бардырыллыкъды?
— «Страховой пенсияланы юслеринден» федерал законда этилген тюрлениулеге кёре, 2025-чи джылны аллындан башлаб, ишлемеген пенсионерлегеча, ишлеген пенсионерлени пенсияларына индексация этилликди. Бюгюнлюкде ол хар джыл сайын инфляциягъа кёре бир кере этиледи – джылны аллында. 2016-чы джылдан бери ишлеген пенсионерлеге ачха къошууну тохтатхандыла, ёзге джыл сайын алагъа къаллай бир къошуллугъу лицевой счётларында джазылыб баргъанды. Бир сом да бир джанына кетмегенди. Адам ишден кетсе, ол анга тыйыншлы къошакъ ачханы толусу бла аллыкъды. Энди законда этилген тюрлениулеге кёре, ишлеген пенсионер кесини пенсиясыны къозлауун алыб турлукъду.
— Пенсионер кесини пенсиясыны къаллай бир болгъанын, алмай тургъан къозлауларын да айтыб, къайда билирге боллукъду?
— Кърал джумушланы порталында энчи кабинетде андан толу хапар билирге боллукъду. Аны бла бирге Эресейни Социал фондуну Къарачай-Черкес бёлюмюню клиент къуллугъунда пенсионерге керекли информацияны табдырлыкъдыла.
— Ишлеген пенсионерлени пенсияларын кёлтюрюуню джоругъундан бир хапар айтсагъыз…
— Ишлеген адамланы пенсияларын инфляция бла байламлы индексация этген заманда аланы бюгюнлюкде алгъан пенсиялары эсге алынмай, лицевой счётларында джазылгъан пенсиялары эсге алынныкъды. Ол зат этилген къошакъны ёлчемин ёсдюреди. Айтыргъа, 2016-чы джылдан бери къошулургъа керекли ачханы да санаб, пенсиягъа индексация алай этилликди.
— Аны юлгюде кёргюзюрге боллукъмусуз? Сёзсюз да, окъуучула ол заманда иги ангыларыкъ болурла?
— Къалай таб боллукъ эсе, алай ангылатайым. Сёз ючюн, ишлеген пенсионерни пенсиясы 15,4 минг сомду. Саналмай тургъан индексацияла бла бирге 20,4 минг сом пенсионерни лицевой счётунда джазылыбды. Айхай да, лицевой счётда джазылгъан бла тергелсе, пенсиягъа кёбюрек ачха къошулады. Биз да ол джол бла барлыкъбыз – ишлеген пенсионерни пенсиясына не къадар аслам ачха къошулурча этерикбиз. Алай бла, къошакъ ачха 15,4 минг сомгъа этилгенликге, къозлауу 20,4 минг сомгъа кёре боллукъду. Алайын эсге алыгъыз.
Адам ишден кетсе, анга тёленмей тургъан джыллары ючюн толусу бла индексация этилликди.
— 2025-чи джыл ишлеген пенсионерле къууанныкъдыла, аланы пенсиялары ёсерикди, аны ючюн пенсионер тилек къагъыт джазаргъа керекмиди? Ишлеген джеринден къагъыт-ёнге тыйыншлымыды?
— Бир зат да керек боллукъ тюлдю. Келир джылда, башха джылладача, пенсияланы автомат халда ёсдюрлюкдюле. Иш бла баджарылгъан пенсионерле Социал фондлагъа барыб айланмасынла, юйлеринде тургъанлай аланы пенсияларына тыйыншлы къошакъ этилликди.
— Джыл сайын къыркъар (август) айда ишлеген пенсионерлеге ачхачыкъ къошулады. Айхай да, ол кёб тюлдю, алай болса да хар адамны алгъан джалына кёре бир кесек кёлтюредиле. Мындан ары ол тюрленмегенлей къаллыкъмыды?
— Хар джыл сайын къыркъар айны 1-де ишлеб тургъан пенсионерлеге ачха къошулады. Ол да автомат халда этиледи. Аны ишлемеген пенсионерлеге этилген индексациядан башхалыгъы барды: этилген къошакъны ёлчеми хар адамны джылны ичинде алгъан иш хакъына кёре болады. Адамны айлыгъы не къадар уллу болса, этилген къошакъ да анга кёре уллу болады.
— Арт кёзюуде аманлыкъчыла пенсионерлени ызларындан тюшгендиле. Ала, телефон бла сёлешиб, Социал фондну келечилерибиз, дейдиле. Сизге ол къагъыт, бу къагъыт керекди, дейдиле. Аны-муну этмесегиз, пенсиягъызны тыярыкъдыла, деб къоркъутадыла. Аллайладан пенсионер башын къалай сакъларгъа боллукъду?
— Бек сакъ болугъуз. Ала, кертиси бла да, адамланы тынгыларын бузадыла, заран да саладыла. Телефон бла сёлешиб, Социал фондну келечисибиз, персонал данныйлеригизни айтыгъыз, деселе, унамагъыз. Социал фондну къуллукъчулары СНИЛС-ни, паспортну данныйлерин, банк картаны номерин, аны ПИН-кодун эмда энчи кабинетден паролну сормайдыла, излемейдиле. Фондда ишлеген адамла, пенсионерлени юйлерине бармайдыла, телефон бла сёлешиб, керексиз сорууланы бериб, алагъа джууаб излемейдиле. Ол зат эсигизде болсун!
Эресейни Социал фондуну Къарачай-Черкес бёлюмю республиканы джамагъатын танымагъан адамлары бла телефон бла сёлешмезге, тюрлю-тюрлю затла айтханларына ийнанмазгъа, ачха беригиз, пенсиягъызны джарашдырайыкъ, дегенлеге эс бёлмезге чакъырады. Социал фондну клиент къуллугъу пенсияла бла байламлы джумушланы тындырыргъа болушурукъду. Аны кибик кёб функциялы аралыкъла да ишигизге къарарыкъдыла. Аллай джумушла ючюн хакъ да аллыкъ тюлдюле.
— Сорлугъу болгъан адам Социал фондну къуллукъчулары бла къалай байламлы болаллыкъды?
— Сизге керекли информацияны Эресейни Социал фондуну джергили бёлюмюню сайтында эмда официал аккаунтлада табаргъа боллукъду. Ала да быладыла: Эресейни Социал фондуну Къарачай-Черкес бёлюмюню Контактында (https://vk.com/sfr.kchr); Социал фондуну Къарачай-Черкес бёлюмюню Одноклассниклеринде (https://ok.ru/sfr.kchr); Эресейни Социал фондуну Къарачай-Черкес бёлюмюню Телеграм-каналында: (https://t.me//sfr kchr).
Республикада джашагъан адамла билирге излеген затларын «исси линияны» телефону бла сорургъа эркиндиле. Ол телефон джергили Социал фонднукъуду: 8-800-200-02-61 – иш кюнледе 8:00-ден 17:00 сагъатха дери.
Келиб, джергили Социал фондну къуллукъчуларына тюберге излегенлеге да джол ачыкъды. Эресейни Социал фондуну Къарачай-Черкес бёлюмю бу адрес бла орналгъанды: Черкесск ш., Горький атлы орам, 3.
— Сау болугъуз, ишигизден къууаныгъыз.
Ушакъны джазгъан
Мамчуланы Дина.
