Мындан алда, республиканы эмда Черкесск шахарны кюнлерин белгилеген заманда, Къарачай-Черкес Республиканы ара шахарында къачхы эл мюлк джармалыкъ болгъан эди.

Ары бизни республикадан, хоншу регионладан 50 эл мюлкчю келген эди. Джармалыкъ кесини ишин драмтеатрны аллында Ленин атлы проспектде бардырды. Эл мюлк министерствону къуллукъчулары айтхандан, ала бары да адамлагъа бек керекли эл мюлк продукция келтирген эдиле. Аланы арасында бал, гардош, нартюх, харбыз, цитрус кёгетле, алма, кертме, башы алынмагъан сары джау, бышлакъ, сюзме, тууар, къой эт, чабакъ, тюрлю-тюрлю ашарыкъла дагъыда башха затла бар эдиле.
«Асламысына былайда хазыр ашарыкъ затла — эт, сют продукциядан этилгенледиле. Хар зат иги сатылады, артыкъсыз да эт. Фермерле къууанадыла. Биз, сатыучула, сатыб алыучула да разы болсала излейбиз, бу джол да алай болду. Кесигиз кёресиз, былайгъа джыйылгъан джамагъат бек разыды. Бу сатыла тургъан товар супермаркетледен, тюкенледен эсе 40 процентге учузду», — деди КъЧР-ни эл мюлк министрини орунбасары Джамбулат Лехов.
Джармалыкъда кеслерини продукцияларын джергили эл мюлкчюледен сора да, хоншу регионладан, асламысына Ставрополь крайдан, энчи предпринимателле, фермерле келтирген эдиле. Джармалыкъны баш мураты эл мюлк продукция чыгъарыучуланы джакълау, алагъа джол бериу эмда джергили джамагъатны эл мюлк продукция бла учузуракъ багъасы бла баджарыу эди. Былайда хар адам излеген затын табыб къууанырча эди.
Алгъаракъда быллай эл мюлк джармалыкъла Къарачай шахарда, Хабез районда болгъандыла. Къарачай-Черкес Республиканы Башчысы Темрезланы Рашидни буйругъу бла быллай джармалыкъла аууз-герги (октябрь) айны аягъына дери республиканы бютеу муниципал районларында да бардырыллыкъдыла.

Лепшокъланы Хусеин.