Бу кюнледе Нарсана шахарны «Гара сууларында» («Нарзанная галерея») суратчы Ольга Бабенкону кёрмючю ачылды.

Ол къуру къарачай атланы суратларындан джарашдырылгъанды. Аны эл мюлкню устасы, къарачай атланы джик-джигине дери билген, алагъа атаб талай китаб джазгъан белгили джамагъат къуллукъчу Ёзденланы Шарафатдин къурагъанды.
Кёб адам джыйылгъан эди. Кёб тюрлю миллетни, юч тюрлю динни келечиси келген эди. Нарсана шахарны межгитини имам-хатыбы Бердиланы Мурат хаджи, Нарсана шахарда клисаны башчысы протоирей Чеканов Димитрий, Нарсанада раввин Акива Авшолом Худайнатов, Эресейни атчылыкъны айнытыугъа аталгъан ассоциациясыны советини тамадасы Кулаковский Владимир, Дружба элни сыйлы къартлары (къарачай миллет кийимледе), атчыла, джамагъат къуллукъчула Мамаланы Халис, Семенланы Арсен, Джанибекланы Юсюп, Сарыланы Руслан, Байчораланы Мурат дагъыда башхала.
Нарсанада солугъан адамла, гара ичерге киргенле, кёрмючге аталгъан байрамны къуршоугъа алыб, джыргъа, тепсеуге да къошула, заманларын зауукълу ётдюрдюле. Байрам деб айтханыбыз да аны ючюндю – Къарачайны белгили джырчылары, тепсеучюлери сёлешгенлени алмашдыра, кёз ачарча къурагъан эдиле тюбешиуню.
«Адам кёб джюрюген джерде миллетибизни юсюнден, малыны, башха мюлкюню юсюнден айтханлай, эшитдиргенлей турургъа керекбиз. Нарсанада бу «Нарзанная галереягъа» келмеген адам джокъду. «Къарачай» деген сёз къулакълагъа чалышханлай турургъа керекди. Иги затыбыз кёбдю, кёргюзе билирге керекбиз», – дейди Ёзденланы Шарафатдин.
«Мен къарачай атланы бир да бек джаратама, айырыб, аланы суратха алыргъа сюеме. Ариу халили, айтханынгы ангылагъан, акъыллы джанладыла», - дейди Бабенко Ольга.
Ольганы къарачай атла бла суратлары, Ёзденланы Шарафатдинни къарачай атланы юсюнден джазгъан китаблары тыш къраллагъа дери ётгендиле.

(Бизни корр.).