Мындан алда Къарачай-Черкес Республиканы 8000 адамы, Джаяу джюрюуню кюнюне аталгъан Бютеуроссия спорт эришиулеге къошулуб, кючлерин сынадыла.Эришиуге къошулгъанла, Черкесск шахарда Покровский паркдан джолгъа чыгъыб, Ленин атлы орам бла барыб шахарны ара майданына джетиб тохтадыла. Бу эришиуге къошулгъанланы арасында сабийле, къартла, спортчула, бир юйдегини адамлары, сакъатла бар эдиле.
Юч километр марафон бошалгъандан сора, эришиуге къошулгъанлагъа атаб, Правительствону Юйюню аллында джергили артистле концерт кёргюздюле.
Россияны Олимпия комитетини кёбчюлюк спортну айнытыу джаны бла бёлюмюню тамадасы Наталья Хамидова, бизни регионда быллай уллу магъанасы болгъан спорт эришиулени болгъанларына уллу разылыгъын билдире, Россияны Олимпия комитетини президенти Александр Жуковну алгъышлау письмосун джыйылгъанлагъа окъуду.
Анда: «Эм алгъа мен сизни барыгъызны да Къарачай-Черкес Республиканы 25-джыллыкъ юбилейи бла алгъышлайма, республикагъызгъа мындан ары да джашнау, аны джамагъатына уа саулукъ-эсенлик теджейме. Джаяу джюрюуню Бютеуроссия кюнюне сиз барыгъыз да тири къошулгъансыз. Бу эришиуле сизни кёлюгюзню джарыкъ эмда къууанчлы этген болурла деб келеди мени кёлюме. Россияны Олимпия комитети Россияда кёбчюлюк спортну ёсдюрюуге, айнытыугъа не заманда да эс бёлюб тургъанды эмда мындан ары да бёллюкдю. Биз уллу масштаблы проектлени джашаугъа сингдириб, алагъа къралыбызны джамагъаты къошулуб турурча этерикбиз. Мен айтмасам да, кесигиз бек ариу билесиз, адамны джашауунда спортну къаллай магъанасы болгъанын. Аны бла кюрешгенле саулукълудула, не заманда да аланы кёллери джарыкъды. Башында айтханыбызча, мындан ары да кёбчюлюк спортну джашаугъа терен сингерча этерге кюрешиб турлукъбуз. Ол зат къралыбызны джамагъатын бирикдирирге себеблик этерикди.
Ючюнчю джаяу джюрюуню Бютеуроссия кюнюне къошулгъанланы барына да ишде джетишимле, рахатлыкъ, саулукъ-эсенлик, спортда хорламла теджейме…» - деб джазылыб эди.
Наталья Хамидова Россияны Олимпия комитетини президенти Александр Жуковну письмосун окъуб бошагъанында, джыйылыб тургъанла иги кесек заманны харс уруб, письмону авторуна уллу разылыкъларын билдирдиле.
Мындан алда билдиргенибизча, бизни республика «Флагман Олимпийской страны» деген конкурсха тири къошулуб, аны эсеблерине кёре регионланы арасында биринчи орунну алгъан эди. Аны амалтын Россияны Олимпия комитети Ючюнчю джаяу джюрюуню кюню бизни республикада боллугъун излеген эди да, мындан алда бардырылды. Бизни республиканы джамагъаты не заманда да тюрлю-тюрлю кёбчюлюк спорт эришиулеге тири къошулуб туруучанды, бу джол да алай болду.
Россияда Джаяу джюрюуню кюню 2014-чю джылдан бери бардырылады. Башха къраллада спорт эришиулени бу тюрлюсю бардырылгъанлы 20 джылдан аслам болады. Анга 150 къралны адамлары къошуладыла. Орта тергеу бла джыл сайын кеслерини кючлерин 12 миллион адам сынайды бу эришиуледе.
КЪОБАНЛАНЫ Махмут.
{jcomments}
