Къарачай-Черкесияны, Эресейни тарихинде энчи ыз къойгъан махтаулу уланларыбызны бири эди Эресейни Джигити, штурм авиацияны лётчиги, капитан чынны джюрютген Биджиланы Локъманны джашы Солтан-Хамид.
Мындан алда Зеленчук стансени Биджи улуну атын джюрютген 2-чи номерли орта билим берген школунда, анга 105 джыл толгъанына аталыб, эсгериу митинг-линейка болду. Алайгъа келгенлени арасында Зеленчук районну ветеранларыны советини тамадасы Орусланы Назбий, Эресейни МВД-сыны «Зеленчукский» бёлюмюню, Джамагъат советини эмда Ветеранларыны советини тамадасы отставкада майор Батчаланы Мухат, Уруп аскер военкоматны келечиси Виктор Полянский эмда башхала бар эдиле.
Школну директору В.Чернышова Эресейни Джигити Биджиланы Солтан-Хамидни юсюнден кёб джылы сёз айтды. Ол, аны адамлыгъыны, тирилигини, джигитлигини юсюнден сёлешиб, Биджи улу къралыбызгъа хар заманда да джараб тургъанын билдирди.
Аны ызындан Батчаланы Мухат махтаулу джердешибизни джашау джолуну юсюнден доклад этди.
— Солтан-Хамид Уллу Ата джурт къазауатда гитлерчи фашистле бла сермешледе джигитлик, эркишилик танытыб, джанын-къанын аямай, сермешгенди. Ол Ата джуртун къоруулай уллу джигитликле кёргюзгенди. Анга «Эресейни Джигити» деген ат 1995-чи джыл аууз-герги (октябрь) айны 5-де берилгенди. Ай медет, Джигит кеси ол кюннге дери джашамагъанды. Сомов кесини «Четверо суток и один день» деген китабында Солтан-Хамид таб оноу эте билген, джигит къазауатчы болгъаныны, аны башха ашхы шартларыны юсюнден джазады. Андан сора, Биджи улуну джашау джолун ачыкълай, аны юсюнден, аны бла бир полкда болгъан лётчик-космонавт генерал-майор Георгий Береговой кесини «Небо начинается на земле» деген китабында бизни джердешибизни адамлыгъыны, ишленмеклигини, тирилигини, джигитлигини, ётгюрлюгюню юсюнден терен хапар айтады. Ала экиси бир-бирине къонакъгъа барыб тургъандыла, ол шохлукъну ахыр кюнлерине дери сакълагъандыла. Солтан-Хамид тау миллетибизни, республикабызны, Эресейни атын махтау бла айтдыргъан онглу уланланы бири эди», — деб, аны юсюнден кёб хапар айтды.
Аны ызындан талай адамгъа, аланы ичлеринде сохталагъа да, сёз берилди. Ала Солтан-Хамид Зеленчук районну, Къарачай-Черкес Республиканы социал-экономика, джамагъат-политика джаныны ёсюмюне къошхан уллу юлюшюнден хапар айтдыла. Ол Коммунист партияны Зеленчук район комитетини секретары, кеси ишлетген «Спираль» заводну директору болуб, ёсюб келген джаш тёлюню патриотлукъгъа, тириликге, халкъланы арасында шохлукъну бегитирге атаб кёб иш этгенин чертиб, анга Черкесскеде, Къарачай шахарда, Учкуланда, Зеленчукда бюстла салыннганларын билдирдиле.
УЗЕИРЛАНЫ Хусей.
