Озгъан солуу кюнледе «Непокоренный Кавказ» деген машина чаришге къошулгъан къауум Къарачай-Черкесиягъа къайтханды.
«Непокоренный Кавказ» деген машина чариш ёсюб келген джаш тёлюню патриот ангысын ёсдюрюр мурат бла къуралгъанды. Быйыл ол Уллу Ата джурт къазауатны кёзюуюнде ата-бабаларыбыз немча аскерчилени Кавказ тулада къаушатханларыны 81-джыллыгъына аталыб бардырылгъанды.
Бу патриот ишге къошулгъанлагъа Краснодар крайны Мостовской районунда профсоюз бирлешликлени бирикдирген советни председатели, сынамлы джамагъат ишчи Владимир Ассовский башчылыкъ этеди. Проектни автору да ол кесиди.
«Непокоренный Кавказ» деген проектни тамалында Эресейни Къыбыласындан 6 регионну патриот бирлешликлери бирикгендиле. Ала, школла, музейле дегенча тюрлю-тюрлю учреждениелеге айланыб, кёб тюрлю патриот иш бардырадыла. Бу машина чариш да аланы бириди.
«Шахарланы, эллени аралары бла баргъан джолубузда аллыбызгъа чыкъгъан джаш адамланы патриот ангыларын ёсдюрюр мурат бла башлагъанбыз бу ишни.
Арт кёзюуде Экинчи дуния къазауатны эсеблерин тюрлендирирге, бизни Ата джуртубуз миллетчилени къурутуугъа къошхан юлюшню унутдурургъа ууланнганла кёб бола башлагъандыла. Алагъа джол бермез ючюн кюрешебиз. Уллу Ата джурт къазауатда ата-бабаларыбыз этген джигитликле бла ёхтемлене, тарихибизни келир тёлюлеге тюзюча сакъларгъа, аланы Ата джуртха сюймекликлерин ёсдюрюрге керекбиз.
Алай этиу Уллу Ата джурт къазауатда джуртубузну къоруулагъан ата-бабаларыбызны алларында да, бюгюнлюкде аскер къаугъагъа къошулуб, къралыбызны политикасын джакълагъан джигитлерибизни алларында да баш борчубузду», — деди РФ-ны Кърал Думасыны депутаты, «Непокоренный Кавказ» деген проектни къурау комитетине кирген Светлана Бессараб.
Владимир Ассовский бла Светлана Бессараб айтхандан, машина чаришге къошулгъанла джолгъа къыркъаууз (сентябрь) айны 13-де Краснодар шахардан чыкъгъандыла. Ала, Краснодар крайда Крымск шахаргъа, Къарачай-Черкесиягъа, Адыгеягъа, Терк Башы Тегейге, Ставрополь крайгъа, Къабарты-Малкъаргъа къайта, 2 минг километр чакълы бирни барлыкъдыла.
Чаришчиле бизни регионда Джёгетей Аягъы район бла Черкесск шахарда болгъандыла.
Джёгетей Аягъында алагъа ветеранла, къазакъла, Афган къазауатны ветеранларыны союзуна киргенле, джамагъат бирлешликлени келечилери джылы тюбеб, къонакъла бла бирге Уллу Ата джурт къазауатда ёлген джердешлерибизге аталгъан мемориал комплексге баргъандыла. Алайдан да къуршоуланнган Ленинградда туугъан, бизни республикада ёсген Рамазан Адзинов бла да тюбешгендиле.
Къонакъла, къонакъбайла да КъЧР-ни музейинде-заповеднигинде да болгъандыла.
Чаришчиле 9-чу номерли гимназияны сохталары бла патриотлукъну юсюнден бир кесек ушакъ этгендиле.
«Заман ёте, адамланы хар неге къарамлары тюрлене баргъанлыкъгъа, патриотизм, тарихни эсгериу дегенча хар бирибизге да магъаналы ишлеге эс бёлюннгенлей турады.
Ала джюрекледе Ата джуртха джылы сезимлени уятадыла, ана тилибизни сюерге, адетлерибизни сакъларгъа кёллендиредиле. Аны ючюн патриотлукъгъа аталгъан ишле асламыракъ бардырылсала игиди», - дейди Джёгетей Аягъы районда директорланы сабийлени ариу халиге юретиуню хакъындан кенгешчилерини координатору Атабийланы Зухра.
СОЛТАНЛАНЫ Зульфия.
