"Аскер къаугъагъа къошулуб, Ата джуртубузну политикасын джакълай тургъан балала! Халкъ биригиуню кюню бла алгъышлай, сизге уллу бюсюреу этгеними билдиреме.

Украинада, аскер къаугъа бардырыла тургъан джерледе, байрамны белгилер къайгъылы болмагъаныгъызны ариу ангылайма. Алай болса да, мен Къарачай-Чекесиядан джиберген исси салам джюреклеригизни джылытыр деб ышанама.

Къралыбыз ауур сынауладан сый бла ётерге керек болгъан къыйын заманда тамбла кюнюбюз джарыкъ болуруна сизни бирикмеклигигиз бла джигитлигигиз ышандырадыла.

Бусагъатда сиз къралыбызны тынчлыгъын, эркинлигин сакълар ючюн къазауат бардырасыз.
Сизге тынч болмагъанын ангылайбыз. Биз, тылда турсакъ да, сизге бек къайгъыргъаныбызны, хорлам бла къайтырыгъызны, сизни бла бирге къууанч эте, тынчлыкълы джашарыбызны ашыгъыб сакълагъаныбызны билигиз.

Бу Халкъ биригиуню кюню барыбызгъа да къазауатны бошалырына белги болсун! Хорламны кюню къысха заманда джетерине, кеси разылыгъы бла СВО-гъа къошулгъан туудугъуму къучагъыма сау-саламат къысарыма мен бек ышаныб сакълайма.

Хар кюн сайын анга да, башха аскерчилеге да тилек тилейме. Аллах болсун нёгеригиз! Къууанч бла, Хорлам бла къайтыгъыз!" - дейди амма.