2024-чю джылны аягъына Къарачай-Черкесияны Къызыл китабы джангыдан басмадан чыгъарыкъды. Китабда бизни регионда джашагъан эмда ёсген 353 джаныуарны эмда ёсюмлюкню юсюнден хапар айтыллыкъды.

Китабха Москвада кърал университетни, Тебердиде миллет паркны эмда Къарачай-Черкес кърал университетни къуллукъчулары тинтиу-излем ишлени юсю бла джыйгъан материалла кирликдиле.
Къызыл китабха тюшерге тыйыншлыланы излеу тохтаусуз барады. Къарачай-Черкес Республиканы Къызыл китабы быйыл экинчи кере чыгъарыкъды. Алимле аны басмагъа хазырлау бла тёрт джыл кюрешгендиле.
Биринчи китаб дунияны джарыгъын 2013-чю джыл кёргенди. Анда 156 тюрлю джаныуар эмда 179 тюрлю ёсюмлюк эмда джууаны (грибни) талай къаууму орун алгъандыла. Арадан он джыл ётгенден сора, Къызыл китаб джангыдан басмадан чыгъарыкъды.
Джангы китабда къорууланыргъа тыйыншлы объектлени саны да аслам болгъанды. Кёб турмай чыгъарыкъ Къызыл китаб 164 тюрлю джаныуар, 189 тюрлю ёсюмлюк эмда джууаланы талай къаууму бла шагъырей этерикди.
Къорууланыргъа керекли тюрлюлени ичлеринде красношейная поганка, кобчик, обыкновенная горлица, сизоворонка, жужелица Константинова, шмель тулупчатый эмда красотел пахучий бардыла.
Джангы Къызыл китаб 500 экземпляр болуб чыгъарыкъды.