Ана деген сёз джерни юсюнде эм багъалы сёзлени бириди.
Ол адамгъа къан бла кирген керти сёздю. Ана баласына кече-кюн да къарайды, кючюн береди. Аны саулугъуна, ашарыгъына, окъуууна, сау-эсен болуруна къайгъыргъанлай турады. Ол джюрек джылыуун, сюймеклигин, джашауун баласына атайды. Анга не къадар кёб игилик этерге кюрешеди. Бала анасыны айтханын этмей, джюрегин къыйнагъаны болса да, ол аны сюеди, багъалатханлай турады.
Мен тёрт сабийи болгъан бир джаш ананы Тохчукъланы Исмаилны къызы Ёзденланы Зульфияны юсюнден хапар айтыргъа излейме.
Зульфия 1985-чи джыл аууз-герги (октябрь) айны 16-да Ючкекен элде халкъны ашхы адетлерин тутуб джашагъан Исмаилны юйдегисинде туугъанды. Туугъан элинде 7-чи номерли орта школну алтын медалгъа бошагъанды. Аны бла биргелей, музыка школгъа да джюрюб, аккордеонда согъаргъа юреннгенди. Ол билимин ёсдюре, 2003-чю джыл Ставрополь шахарда Шимал Кавказ къурулуш университетге кириб, аны «Бухучёт, анализ и аудит» деген факультетин къызыл дипломгъа тауусханды. Джаш уста 2009-чу джыл Ставрополда Пенсион фондну пенсияла чыгъаргъан бёлюмюнде ишлеб тебрегенди. Алайда эки джылны ичинде къыйын ишин тыйыншлы дараджада толтура, адамла бла джумушакъ тилде сёлеше, кёбледен сый-махтау табады.
Зульфия 2011-чи джыл Ёзденланы Асланбийни джашы Мурат бла джашауун бир этеди. Муратны иши Краснодарда болгъаны ючюн, ала ары кёчедиле. Зульфия анда да Пенсион фонда ишге джарашады, былайда да пенсияла чыгъаргъан бёлюмде тамадаладан, адамладан бюсюреу табыб ишлейди. Джаш юйдеги алайдан Черкесскеге кёчеди. Мурат Джёгетей Аягъы районну ара больницасында врач-хирург болуб онбир джыл ишлегенди. Бусагъатда Краснодар крайда Отрадный станседе хирургия бёлюмню тамадасы къуллукъну толтурады. Алагъа тёрт сабий тууады.
Рамазан Черкесскени 17-чи номерли школуну 6-чы классына джюрюйдю. Школда айырмагъа окъуйду. Ингилиз тил бла математиканы бек сюеди. Спорт бла да кюрешеди, бу джаны бла да джетишимлери игидиле.
Амина Черкесскени 17-чи номерли школуну 4-чю классына барады. Ол да иги окъуйду.
Аиша бла Мухамматчыкъ «Журавлик» атлы сабий садха джюрюйдюле. Зульфия баш иеси Мурат бла бирге сабийлерин халкъны ашхы адетлерини, адебини, намысыны тамалында ариу халили этиб ёсдюрюрге джашауун атагъанды. Анга кесини анасы, къайын анасы да болушадыла. Джигер ана, сабийлерине тыйыншлысыча къарай, аны тышында да, тюкенчик ачыб, анда да сатыу этерге заман табады. Ол сыйгъа, махтаугъа да тыйыншлыды.
Ана десек, аналарыбыз кёзюбюзге кёрюнедиле. Къалай татлыды, сыйлыды, багъалыды ана деген сёз. Хар ана да, баласына къууана, саулугъу бла кёб джылланы джашасын!
Лепшокъланы Хусеин.
