Окъуу джылны экинчи четверти къызыу барады.
Джангы Джылны байрамына хазырланыу, тюрлю-тюрлю предметледен олимпиадала бла спорт эришиулеге къошулуу дагъыда алача школ джашау бла байламлы джумушланы дерследен сора сохтала устазлары бла бирге да, кеслери да этиб кюрешедиле. Дерслерине да ол джумушла къошулуб, сохталагъа бир кесек къыйыныракъ болса да, ала кёллениб, билимлерин ёсдюрюрге тырмашадыла. Республиканы бирси школларындача, Джёгетей Аягъы районну Важное элинде орта школну сохталары да тюрлю-тюрлю конкурслада, эришиуледе хорлай, алчыла болур ючюн къалмагъандыла. Алайды да, окъуучуларыбызны бюгюн ол школну айырма сохталарыны бири бла – Темрезланы Русланны къызы Раксалана бла – шагъырей этерге излейбиз.
Раксалана сегизинчи классны сохтасыды. Ол биринчи классдан башлаб, бюгюннге дери айырмагъа окъуйду. Кесинден гитчелеге болушургъа ашыкъгъан, уллуну сыйын кёрген, намыслы, ариу халиси болгъан къызчыкъды ол. Атасыны, анасыны, устазланы айтханларын джерге тюшюрмей этеди. Устазлары аны окъургъа сюйгенини, билимин ёсдюргенлей турургъа талпыгъаныны юсюнден школда сохталагъа юлгюге айтханлай турадыла. Аны ол ашхы шартларына район дараджада бардырылгъан олимпиадада хорлагъаны шагъатлыкъ этеди. Раксалананы билимин сынау къуру ол эришиуле тюлдюле.
Ана тил бла литературадан дерслени уа ол айырыб бек сюеди. Мындан алда сохталаны арасында ана тил бла литературадан эришиуледе, сорууланы барысына да тюз джууабла бериб, биринчи оруннга чыгъыб, туугъан школуну атын махтау бла айтдыргъан эди. Школ предметлени айырмагъа окъугъаны бла да къалмай, Раксалана спорт бла кюреширге да заман табады. Бир такъыйкъасын да бошуна ашырмайды дерге боллукъду. Спорт кружоклагъа джюрюгенлей турады. Артыкъсыз да теннис ойнаргъа бек сюеди. Школну теннис спорт командасыны къурамында спорт эришиулеге талай кере къошулгъанды. Уста ойнагъанын танытыр ючюн къалмайды. Аны юсюне да ол джырларгъа, тепсерге чемерлиги бла да кесин школну сохталарына, устазларына да бек сюйдюргенди. Элни Джарыкълыкъ къаласында джангы ачылгъан тепсеу кружокга сюйюб джюрюйдю. Кружок джангы ачылса да, анда сабийле тюрлю-тюрлю концерт программаларын кёргюзюб, адамланы джюреклерин къууандыргъанлай турадыла.
Былайда таулу къызчыкъны дагъыда бир джетишимлерин айтыргъа тыйыншлыды. Раксалана, тарих дерсни устазы Къасайланы Сейит-Алийни къызы Алина бла бирге нартланы юсюнден илму иш джазыб, район дараджада ёчлю оруннга тыйыншлы болгъанды. Дагъыда озгъан окъуу джылда миллетибизни къара кюнюне аталгъан эришиуледе талай тюрлю конкурс баямланнган эди. Анга къошулгъан сабийлени арасында Темрезланы Раксалана, сочинение джазгъан, сурат салгъан, азбар окъугъан конкурслада хорлаб, баш саугъалагъа ие болгъанды.
Раксалананы гитче заманындан бери да фахмулу, хар кёргенине эсин ийиб ангысына дженгил алгъан сабий болгъаныны юсюнден аны биринчи устазы Нина Михайловна Дрябина да хапар айтханды.
Раксалана, школну айырмагъа тауусуб, врач болургъа къаст этгенди. Ол юреннгенича, къолундан келгенича, адамлагъа джараргъа, болушургъа деген нюзюрюн баш муратха салыб турады. Биз да, устазларын, атасын, анасын, миллетин сюйген, бетин чыгъаргъан чемер таулу къызчыкъгъа, муратлары толсунла деб алгъышлай, окъууда джетишимле теджейбиз. Сёзсюз да, Раксаланача сабийле, къуру Важное элни школуну сохталарына болуб къалмай, республиканы бютеу школларында сабийлеге да юлгюдюле.
БАТЧАЛАНЫ Фатима.
