Санкт-Петербургда «Живая классика» деген халкъла арасы сабий адабият форум бардырыллыкъды.

Анга къошаргъа Эресейни сохталарындан 40 сабийни сайлагъандыла. Ол къауумгъа Къарачай-Черкесиядан Элкъанланы Борис да киргенди.
Элкъанланы Борис Черкесск шахарны 8-чи номерли школуну сохтасыды. Ол быйыл арттотур (апрель) айда «Живая классика» атлы халкъла арасы конкурсда хорлаб, бизни регионда биринчи болгъан эди. Къыркъаууз (сентябрь) айда уа, Борис «Живая классика» фондну эм алчысына, юлгюлюсюне саналгъанды – фондну амбассадору болгъанды.
– Элкъанланы Борис амбассадорча Черкесск шахарны школларыны сохталарына адабият ингирле, сайтлада билимни ёсдюрген тюрлю-тюрлю оюнла, онлайн халда викторинала къурайды. Ол къурагъан ишлеге кёб сабий къошулады, кеслери да бек джаратханларын джазыб билдиргенлей турадыла. Сохталаны эслерин литературагъа бурурлай, ол процессге башхала да къошулурлай нюзюр бла кюрешеди Борис, – деб билдиргендиле Черкесскени Окъуу управлениесинде.
«Живая классика» форумгъа къошулгъанла энтда джангы затлагъа юренникдиле, джангы билим къошарыкъдыла. Сёзден, ала адабият дунияда бюгюннгю айтылгъан белгили экспертлени лекцияларына тынгыларыкъдыла, джамагъатны аллында чыгъыб сёлешген усталыкъдан мастер-класслагъа къарарыкъдыла, талай сабий китабны да сюзерикдиле дагъыда алача кёб джангы затха кёз ачарыкъдыла.

(БИЗНИ КОРР.).