КъЧР-ни Башчысы Темрезланы Рашид «Знание» деген эресейчи джамагъат бирлешликни Къарачай-Черкесияда бёлюмюню къараучу (наблюдательный) советине башчылыкъ этерикди.
Темрезланы Рашидни кандидатурасын «Знание» деген эресейчи джамагъат бирлешликни регионал бёлюмюню джыйылыуунда джакълагъандыла. Бюгюнлюкде «Знание» бирлешликни къараучу советлери къралны 70 регионунда ишлейдиле.
«Бирлешликни къараучу советине башчылыкъ этиу меннге уллу сыйды эмда джууаблылыкъды. Мен бусагъатха дери да «Знание» бирлешликни ишине эс бёлгенлей тургъанма. Къралыбызны Президенти Владимир Путин, ол бирлешлик баджаргъан джумушлагъа уллу багъа бере, аны иши Эресейни хар регионунда да тири джюрюш бла барыргъа кереклисин чертген эди. Эресейни башха регионларындача, Къарачай-Черкесияда да бирлешликни бёлюмю ишин джетишимли бардырады. Аны къурамына тюрлю-тюрлю санагъатлада махтаулу уруннганла киргендиле. Бирлешликни келечилери СВО-гъа къошулгъанлагъа, Президентибиз салгъан борчлагъа уллу эс бёлгенлери бек къууандырады. Былай алыб къарасакъ, билим – ол Эресейни маданиятыны баш байлыгъыды, аны себебли, бизде алимлени, терен билимли, фахмулу адамланы не заманда да сыйлары уллу болгъанды. Алай бла, «Знание» деген бирлешликни лекторлары ёсюб келген джаш тёлюню патриот сезимлерин, тин байлыкъларын ёсдюрюуге, аланы ариу халиге юретиуге тыйыншлы юлюш къошадыла», – дегенди Темрезланы Рашид.
«Знание» деген эресейчи джамагъат бирлешликни Къарачай-Черкесияда бёлюмюню джыйылыуу бу кюнледе Шимал Кавказ кърал академияда ётгенди. Анда джыйылгъанлагъа КъЧР-ни Башчысыны эмда Правительствосуну Администрациясыны тамадасыны биринчи орунбасары Хубийланы Марат хошкелди айтханды.
Джыйылыугъа «Знание» бирлешликни регионал бёлюмюню келечилери, лекторлары, экспертлери къошулгъандыла – КъЧР-ни Халкъ Джыйылыууну депутаты, КъЧР-ни махтаулу журналисти, «Архыз 24» телеканалны баш редактору Батчаланы Мадина, Бютеуэресей Халкъ фронтну Къарачай-Черкесияда бёлюмюню тамадасы Каппушланы Людмила, Регионну управление аралыгъыны тамадасы Аппакъланы Ахмат дагъыда башхала.
Джыйылыуну кёзюуюнде Шимал Кавказ кърал академияны ректору, «Знание» деген бирлешликни регионал бёлюмюню председатели Къочхарланы Руслан, «Архыз 24» телеканалны редакциясы, билим бериу ишни тыйыншлысыча баджаргъанлары ючюн, хурмет грамотала бла саугъаланнгандыла.
«Бюгюн «Знание» деген бирлешликни регионал бёлюмюню къараучу советине башчы сайланды. Анга Темрезланы Рашидни кандидатурасын барыбыз да бир аууздан джакълагъанбыз. Алай бла, бирлешликни регионал бёлюмю ишин андан да иги къураргъа, Къарачай-Черкесияда билим бериуню файдалыгъын ёсдюрюрге боллукъду. Къысха заманны ичинде бизни филиал, мийик кёргюзюмлеге джетиб, 2024-чю джылны эсеблерине кёре 10 эм игини тизимине киргенди. «Знание» бирлешликни баш борчу хар ким да тыйыншлы билим алырча болум къурауду. Алайды да, биз барыбыз да биригиб, ол борчну толтурлугъубузгъа ишек джокъду», – дегенди ШККъА-ны ректору, «Знание» деген бирлешликни регионал бёлюмюню председатели Къочхарланы Руслан.
2024-чю джыл «Знание» бирлешликни Къарачай-Черкесияда бёлюмю 700-ден артыкъ лекция, мастер-класс бардыргъанды. Алагъа республикада джашагъан 16 минг адам къошулгъанды.
Озгъан джыл бирлешликни республикада бёлюмю 10 алчы регионну бирине саналгъанды. Алай бла, «Знание» деген эресейчи джамагъат бирлешликни баш директору Максим Древаль регионал филиалны директору Болатланы Артурну Хурмет грамота бла саугъалагъанды.
«Знание. Государство» деген проектни тамалында республикагъа Олимпия оюнланы чемпионлары Светлана Ромашина бла Мария Киселёва келген эдиле. Аны бла бирге, «Знание» деген бирлешлик бла «Архыз» курортну араларында байламлылыкъ джюрютюуню юсюнден кесаматха къол салыннган эди, федерал проектлени регионал этаплары да бардырылгъан эдиле.
Къараучу совет кенгеш органды. Ол кърал эмда джергили власть органла, джамагъат бирлешликле, билим бериу учреждениеле, башха организацияла бла байламлылыкъ джюрютюр нюзюр бла къуралгъанды.
САЛПАГЪАРЛАНЫ Умар.
