Мындан алда Къарачай шахарны «Олимп» деген спорт къаласында, Эресейни махтаулу юретиучюсю Абдулманап Нурмагомедовну сыйына аталыб, миллет тутушдан Къарачай-Черкес Республиканы кубогу ючюн ачыкъ эришиуле болдула.

Аланы Къарачай-Черкесияны Тинтиу управлениесини тамадасыны орунбасары Алчакъланы Рамазан къурады, ёчлени да ол хазырлагъан эди. Анга джууукълары, тенглери, КъЧР-ни спорт комитети, башхала да болушхандыла.
Алайгъа келгенлени арасында Дагъыстанны, Къабарты-Малкъарны, Ставрополну, Къарачай-Черкесияны командалары бар эдиле.
Тутушну ишине къошулуб, аны къурагъанлагъа разы болуб сёлешгенлени арасында белибаула бла тутушдан дунияны беш кере чемпиону Акъбайланы Ренат, Эресейде Белибаула бла тутушдан федерацияны биринчи вице-президенти, Эресей Федерацияны махтаулу юретиучюсю Зиякаев Рустам, Эресейни спортуну устасы, Башкортостан Республиканы белибаула бла тутушдан вице-президенти Рустем Ривгатович, белибаула бла тутушдан Эресейни джыйым командасыны баш юретиучюсю, Эресейни махтаулу юретиучюсю Лайпанланы Дахир, Эресейни матаулу юретиучюсю, Дагъыстан Республиканы Кикбоксинг федерациясыны президенти Магомед Раджабкадиевич, къралла арасы дараджалы уста жокей, арт он джыллада Эресейни эм иги жокейи Каппушланы Мырзабек, КъЧР-ни Спортдан аралыгъыны директору Аджиланы Азнаур, КъЧР бла КъМР-ни спортуну ёсюмюне энчи юлюш къошхан Биттирланы Казбек, белибаула бла тутушдан Дагъыстанны джыйым командасыны баш юретиучюсю Хасаев Асланбек эмда башхала бар эдиле.
18 джыл болгъан джаш адамланы арасында «стенка на стенку» деген халда 11 тюрлю ауурлукъда 12 команда тутушду. Джашла фахмуларын, билимлерин, бютеу кючлерин салыб, джигерликлерин, тёзюмлюлюклерин кёргюзе, хорламгъа ие болур мурат бла кючлю джыгъышдыла. Аланы хар бири, кесини энчилигин, тирилигин, дженгил къымылдауун таныта, тюрлю-тюрлю амалланы хайырландырды. Тутуш эртденден ингирге дери барды. Сынамлы, уста сюдюле, кёз туурадан бир затны да ычхындырмай, хар затха тыйыншлы багъа бердиле. Турнирни аягъында сюдю хорлагъанланы, ёчлю орунланы алгъанланы ачыкълады.
Биринчи орунну Къарачай район алды, аны командасына ёчге беш минг сом берилди. Экинчи оруннга Зеленчук район чыкъды, аны командасына юч минг сом берилди. Ючюнчю орунну Черкесскеде «Олимпик» алды, аны командасына эки минг сом берилди. Аны тышында хорлагъанла, ёчлю орунлагъа чыкъгъанла кубокла, медалла бла саугъаландыла. Башха спортчулагъа, юретиучюлеге да саугъала берилдиле. Аланы арасында Гасан Магомедовичге иш этиб къуралгъан ёч – къарачай тукъумлу аламат къочхар – берилди. Эм уллу саугъа Дагъыстанны джыйым командасыны баш юретиучюсю Асламбек Хасаевге джетди. Анга къарачай тукъумлу тайны сертификаты берилди.
Турнирни ишине, аны къурагъанланы къыйынларына сый бере, талай адам сёлешди. Эресей Федерацияны махтаулу юретиучюсю Зиякаев Рустам: «Кюнюгюз ашхы болсун, турнирге келген багъалы адамла, сыйлы къонакъла, къартла, Эресейни махтаулу юретиучюсю Абдулманапны сыйына атаб, мийик дараджада бардырылгъан быллай турнир къурагъаныгъыз ючюн бек сау болугъуз. Мен турнирге къошулгъанланы барына да кюч-къарыу, джетишимле теджейме. Мында Ставрополь крайны, Къабарты-Малкъарны, Дагъыстанны, Къарачай-Черкесияны келечилери бардыла. Ала бир-бири бла танышадыла, ойнайдыла-кюледиле, алай бла халкъланы арасында къарнаш шохлукъну кючю бегийди. Мен бу турнирни къурагъанлагъа, артыкъсыз да Алчакъланы Рамазаннга, джюрек разылыгъымы билдиреме. Сау болугъуз, сизни барыгъызгъа да рахатлыкъ, игилик излейме», – деди.
Аны ызындан Дагъыстанны Кикбоксинг федерациясыны президенти Магомед Раджабкадиевич сёлешди: «Мен былайгъа джыйылгъанланы барына да – джаш адамлагъа, сюдюлеге, юретиучюлеге, бу ашхы ишни къурагъанлагъа – джылы салам береме. Мени бери чакъыргъаныгъыз ючюн, бек сау болугъуз. Бизни уллу юретиучюбюз Абдулманапха аталгъан турнирде тургъаныма бек къууанама. Хар заманда да адамланы, халкъланы арасында шохлукъ, къарнашлыкъ бегигенлей турсун. Бу ишни къурагъан Алчакъланы Рамазаннга, башхалагъа да джашауларында къууанч, насыб, джангы мийик джетишимле, сизни республикагъа бютеу Эресейге джашнау, тынчлыкъ, рахатлыкъ теджейме».
Аны ызындан сёз белибаула бла тутушдан Эресейни джыйым командасыны баш юретиучюсю, Эресейни махтаулу юретиучюсю Лайпанланы Дахирге берилди.
«Багъалы джамагъат, сыйлы къартла, чакъырылгъан къонакъла, башхала, биз сизни бу кюн джылытхан, къонакъны сюйген джамагъат джашагъан джерибизге, Къарачай шахаргъа, келгенигизге бек къууанабыз. Сиз къалайда болсагъыз да сабийлени ёсюмлерине къайгъырыб, аланы спорт бла кюреширге чакъырасыз. Алай этерге излегенле бизни арабызда да кёбдюле. Ала, Къарачай-Черкесияда, Шимал Кавказда, бютеу Эресейде да бардыла. Бютеу спортчуланы, Эресейни джыйым командасыны атындан, быллай турнир къурагъаны ючюн, Алчакъланы Рамазанны алгъышларгъа эркинлик беригиз. Ол спорт эришиуле, джаш адамланы тюз джолгъа саллыкъ башха ишле бусагъатха дери да эте тургъанды. Сау болсун, Аллах анга саулукъ, кюч берсин, – деди Лайпанланы Дахир.
Рамазаннга сёз берилгенинде, ол джамагъатны аллына чыгъыб, алайгъа келген адамланы барына да бюсюреу этиб, анга турнирни къураргъа болушханланы юслеринден хапар айтыб, барына да разылыгъын билдирди.

Лепшокъланы Хусеин.

 

 
{jcomments}