Хурметли бирджуртчуларыбыз!
1943-чю джыл ноябрны 2-де, талай сагъатны ичине, саулай халкъны оноуу этилгенди. Ол кюн, 74 джылны мындан алгъа, Шимал Кавказны халкъларыны ичлеринде биринчи болуб, къарачайлыла Орта Азия бла Къазахстаннга, сюргюннге, ашырылгъандыла.
Миллетни асламысы – къартла, тиширыула эмда гюнахсыз сабийле – къараб-къарагъынчы аталарыны-бабаларыны тарих джуртларында мамыр джашаудан айырылгъандыла. Ол кёзюуде уа, бютеу совет халкъ бла бирге Къарачай-Черкес Республиканы келечилери Ата джурт къазауатны фронтларында къралларын джаудан къоруулай сермешгендиле.
Сюргюнде миллетни кёб адамы ачлыкъны-джаланнгачлыкъны, сууукъну, аурууланы кёлтюралмай, киши джерледе джашауну къыйынлыгъына чыдаялмай джан бергендиле.
Къарачайлыла Къазахстан бла Орта Азияны кёб джерине чачылгъандыла, ары-бери атларгъа эркинликлери болмай, аш-суу табмай инджилселе да, джазыу аланы сындыралмагъанды. Ала кеслерини тиллерин, культураларын, адетлерин, адеблерин-намысларын сакълагъандыла, биригиб, кёллерин иги этгендиле, айхай да, джангы баргъан джерлеринде джашау болумну игилендирирге тыйыншлы юлюш къошхандыла, ишге толу берилген, хоншу бла ариу джашай билген адамла болгъанларын танытхандыла.
Бизни тамада тёлюбюз джюрек джылыу бла киши джерледе къарачай халкъгъа къол узатхан, миллетни юйсюндюрюрге болушхан адамланы эсге тюшюреди. 14-джыллыкъ тюрмени хорлаб, туугъан джуртуна, ызына, къайтхан миллетге къууанч аллы болуб тюбеген мингле бла джердешлерин да ёмюрлюкге эслеринде сакълагъандыла сюргюнню къыйынлыгъын сынаб келгенле.
Биз ётген джолубузну эсде тутаргъа керекбиз, репрессияланы къыйынлыкъларын, ачыуларын да бир миллет да сынамазча кюреширге да борчлубуз.
Кёб миллетли юйдегибизде бир-бирин ангыламакълыкъ, шохлукъ бла мамырлыкъ терен тамыр иерге керекдиле. Не тукъум джарсыугъа да биригиб къаршчы туруу, бир-бирибизге билек-дагъан болуу – бу затладыла бизни Къарачай-Черкесиябызны эмда бютеу Россияны алгъа элтирик, джашнатырыкъ да.
Багъалы бирджуртчуларыбыз, сизни барыгъызгъа да игилик, ашхылыкъ, рахат кёкню тюбюнде мелхум джашау теджейбиз!
КъЧР-ни Башчысы Темрезланы Рашид
КъЧР-ни Халкъ Джыйылыууну (Парламентини)
Председатели Иванов Александр
КъЧР-ни Правительствосуну Председатели
Озов Аслан.
