«БарсЭль Медиа» – ол къарачай-малкъар интернет телевидение бла радиоду. Бу проектни къурагъан, бардыргъан да «БарсЭль» джамагъат бирлешлик бла «Эльбрусоид» фонддула.
Аны ишине миллетибизни тарихи бла тилин сакълаугъа джан аурутхан, маданиятыбызны ёсюмюн кёлтюрюуню терен магъанасын ангылагъан, джаш тёлюню билимли этиуню миллетни эм уллу борчуна санагъан алчы адамларыбыз да къошуладыла.
Бу проектни ишлетир оюм талай джылны мындан алгъа келсе да, техника джанындан мадарла арт кёзюуде къуралгъандыла: интернет технологияланы джетишимлери, бек багъа да болмай, ким да къарарча, тынгыларча мадарла бергендиле. Телевидениени, радиону да бир сайтда къуруб, дунияны къайсы бир этегинде да, интернети болгъан джерледе, хакъсыз къарарча, тынгыларча мадарла бла хайырланнганбыз.
Сёзсюз да, быллай медиа-проект джумушла тамам усталаны къолларында болургъа кереклисин чертебиз. Аны бла бирге, къарачай-малкъар миллетни маданият-джарыкълыкъ, билим ёсдюрюу, кёз ачыу, тин хазнасын джайыу ишледе бизге болушургъа къолларындан келликлени, алай демеклик, бу джаны бла миллетге магъанасы боллукъ материалла хазырлаяллыкъланы бек сакълайбыз. Бу проектни игилендирир, ёсдюрюр джанындан оюмларын, сагъышларын айта, джангы программала къураяллыкълагъа, бар ишлеге къошулургъа тырмашырыкълагъа, энчи юлюш къошаргъа болумлары, усталыкълары джетериклеге: «Хош келигиз!» – дейбиз.
«БарсЭль Медиа» кесине алгъан баш борчну хазыр чыгъармаланы джайыуда кёрмейди. Ол миллетибизни бюгюннгю болуму салгъан излемлени, джангы джетишимлени, бар кемликлени юслеринден кесини энчи программаларында кёбден кёб эте барыргъа учунубду. Ол себебден ана тилни сакълауда этилирге керекли атламланы, тин байлыкъны ёсдюрюуде кёзюулерин сакълагъан уллу ишлени, миллетни билим дараджасын айнытыуда этилирге керекли оноуланы сюзюуге, баджарыугъа къошулады.
Биз бу медиа-проектни халкъ ныгъыш этиб, бар джарсыуланы, джумушланы, джетишимлени, кемликлени миллет бла бирге сюзерге кёллениббиз. Аны бла бирге, «БарсЭль Медиа» политикадан тышындады, бир политика къуллукъчу джанлы болуб, аны бла не тюрлю да иш джюрютюрюк тюлдю. Биз политиклеге, башхалагъа да миллетни джумушларын ангыларгъа болушхандан башха ишлерине къатышмайбыз.
«БарсЭль Медиа» къарачай-малкъар тема бла тохтаб къалмайды. Джарлылыкъланы асламысы бютеу къралыбыз бла байламлы болгъанларын, аланы бирге, бирлешиб тындырыргъа кереклисин ким да ангылайды. Ол себебден бизге бек багъалы Кавказны тюрюн, Эресей Федерацияны кёб тюрлю тин хазнасын, тюрк дунияны кенглигин, ислам динибизни ариулугъун башхалагъа да ангылатыр джанындан ишлейбиз, дунияда сейир затла бла къараучуларыбызны, тынгылаучуларыбызны танышдырабыз.
Джашаугъа къарамлары бизге ушаш башха медиа-ресурсланы бизни бла шохлукъ, иш джюрютюрге чакъырабыз, бириксек, кёб иш этеллигибиз хакъды.
Тутхан ишлеринден хапар джаяргъа излегенлени да рекламаларын бизни юсюбюз бла этерге боллугъун билдиребиз. Къарачай-малкъар миллетге джораланыб этилген проектни магъаналарын ангылагъан спонсорланы да бизге кёлтюргюч болургъа чакъырабыз.
«БарсЭль Медиа» – миллет ючюндю, миллет бла биргеди.
Байрамукъланы
Фатима.
