Бир джердешибиз, инвестицияла бла хайыр тюшюрюр акъылда интернетде къарай келиб, хыйлачыланы сайтларына тюртюлюб джарсыгъанды.

Хыйлачылагъа алдатыб, джарсымаз ючюн, инвестицияла этерге излеген компаниягъызны халын алдан билирге керекди.
Эресейни МВД-ны Зеленчукде районла арасы бёлюмюне ол станседе джашагъан 26 джыл болгъан биреулен тарыгъа баргъанды.
Ол байрым (февраль) айны 11-де интернетде инвестицияла бла хайыр тюшюрюуге аталгъан рекламаны кёрюб, заявканы толтургъанды. Алай этгенлей, анга биреулен, барыбыз да хайырланыучу мессенджерлени бири бла къонгурау къагъыб, инвестицияла бла кюрешир ючюн бир приложениени телефонуна кёчюрюрге кереклисин айтханды, анга ссылканы ашыргъанды. Хайыр алыб башлар ючюн, ачха салыргъа кереклисин да ангылатханды.
Ол адам аны айтханын этерге хыйлачы дагъыда: «Хайыр тюшгенди, аны счётунга кёчюрюр ючюн энтда да ачха салыргъа керексе», – деб, бу джарлыны терилтгенди. Алай бла, зеленчукчю кесек-кесек 298 минг сомну алгъаракъда, артдан да 300 минг сомну хыйлачы айтхан счётлагъа джибергенди. Ачха болгъанын ары ашырыб бошагъанындан сора хыйлачыла муну бла байламлылыкъ джюрютюуню къойгъандыла. Алай бла, ол адам, хайыр тюшюрген къой эсенг, кесини ачхасын да алалмай къалгъанды.
Хыйлачылагъа ашыргъаны, комиссиясы да саналыб, джарсыгъанны бютеулей да 607 400 сому къорагъанды. Аны тарыгъыуу бла терслеу иш ачылгъанды, бусагъатда ол тинтиле турады.
Къарачай-Черкесияны хурметли джамагъаты! Не уллу хайыр теджелсе да, кесамат бегитгинчи кишиге ачха ашырмагъыз. Иш джюрютюб башлагъынчы аллай иш бла кюрешеме дегенни юсюнден толу хапар билигиз.
Аллай хапарны Ара банкны официал сайтында «Проверить участника финансового рынка» деген бёлюмде табаргъа боллукъду. Финансланы джюрютюу бла кюрешген кредит эмда инвестицион организацияланы тизими Федерал налог къуллукъну сайтында «Прозрачный бизнес» деген бёлюмде да кёрюнеди.

Кумукова Рамиля,
КъЧР-ни МВД-ны пресс-къуллукъчусу.