Бу кюнледе КъЧКъУ-ну джангы ачылгъан география факультетинде Къарачай-Черкес Республиканы Джамагъат палатасыны регионла арасы биринчи форуму ётдю.

Аны баш магъанасы джамагъат ишледе тирилик танытыргъа, джууаблылыкъны ёсдюрюрге, бусагъатдагъы джашауда ашхы адетлерибизни, адебибизни сакълар джанындан биригирге чакъырыу эди.
Политикле, дин къуллукъчула, алимле, джамагъат къуллукъчула, джазыучула аны кибик, хоншу республикаланы Джамагъат палаталарыны тамадалары къошулгъан эдиле бу ишге.
Къарачай-Черкес Республиканы Башчысы Темрезланы Рашидни атындан Башчыны эмда Правительствону Администрациясыны тамадасыны биринчи орунбасары Хубийланы Марат джыйылгъанланы алгъышлагъан да этиб, быллай ишлени джамагъатны бирикдириуде уллу магъаналары болгъанларын да чертиб, форумну ишине джетишимле теджеди.
Эресейни Кърал Думасыны депутаты Ёзденланы Солтан бизни республикада кёб миллет джашагъанын черте, мындан ары да шохлукъну, джарашыулукъну сакълар джанындан биригирге керекбиз, деген оюмун айтды.
Эресейни Джамагъат палатасыны миллетле эмда динле арасы джарашыулукъну хакъындан комиссиясыны тамадасы Зорин Владимир республикабызны джамагъатына, айырыб да башчылыгъына, университетни къуллукъчуларына мийик дараджада къонакъбайлыкъ этгенлери ючюн, разылыгъын билдирди. Республикабыз кърал дараджада этилген ишлеге тири къошулгъанына, кёб миллетли Къарачай-Черкес Республикада шохлукъну сакъланнганына, бусагъатда баргъан аскер къаугъада бизни джердешлерибиз ётгюрлюкню танытханларына бюсюреу этиб сёлешди. Ол джаны бла этилген ишлеге къралыбызны Джамагъат палатасы да кесини юлюшюн къошханын чертди, бизни республикада Джамагъат палатаны тамадасы Ляшова Елена ишин таб да къураб, деменгили да бардырагъанына разылыгъын билдирди.
Къарачай-Черкес Республиканы муфтийи Эриккенланы Мухаммат хаджи, Покров клисаны башчысы, провослав динни бабасы Нартов Александр къайсы дин да джарашыулукъгъа, шохлукъгъа чакъыргъанын, мамырлыкъны сакълар джанындан кюреширге баш борчубуз болгъанын чертиб сёлешдиле. КъЧКъУ-ну ректору Ёзденланы Таусолтан да чертди университетде кёб миллетни келечиси окъугъанын, ала, бир юйюрча, шохлукъда тургъанларын.
Форумну пленар кесеги бошалгъандан сора да, секциялагъа бёлюнюб ишледиле. Джыйылыу иги кесекге созулгъан эди. Магъаналы ушакъланы джамагъатха да файдасы болур, къралыбызда мындан ары да миллетле, динле арасы шохлукъ сакъланыр деб, ышанабыз.

Къоркъмазланы Салима.