Мындан алда Эресейде чемер къоллу джаш адамланы «Robo Cup Junior» атлы Миллет чемпионаты баямланнган эди.

Анга, регионла кеслеринде эришиуле бардырыб, алада хорлагъан сабийле къошуллукъдула.
Алайды да, Къарачай-Черкесияны эм ариу джеринде – Доммайда – эм акъыллы, билимли сабийлени арасында эришиуле къызыу барадыла. Анга бизни региондан КъЧР-де фахмулу сабийлеге къошакъ билим берген аралыкъны «Кванториум 09» атлы мобил технопаркыны къаууму къошулгъанды. Аны къурамына Ючкёкен элни 7-чи номерли школуну айырма сохталары киредиле. Сохталаны сынамлы устазла Боташланы Азрет-Алий бла Доюнланы Лейла, кече-кюн демей, къаты кюрешиб, эришиулеге хазырлагъандыла.
Чемпионатда Эресейни беш регионундан келген джаш адамла робототехника эмда алгоритмирование джаны бла кеслерини джангы къурагъан ишлерин кёргюзюб, билимлерин сынадыла. Чемер къоллу джаш адамланы хар бирини ишине ким да керти сейирсинирча эди. Аны себебли, аланы ишлерине багъа берген сюдюлеге да, биринчи оруннга тыйыншлы болгъанны айыргъан тынч тюлдю.
Алайды да, бизни къауумда сабийле – Биджиланы Ислам, Шаманланы Камил бла Малик – кеслерини къол ишлерин кёргюзюб, берилген къыйын джумушланы да джетишимли баджарыб, джыйылгъанланы барысын да сейирсиндиргендиле.
Чемпионатны «Rescue Line» атлы лигасында эришиулеге къошулгъанлагъа бек къыйын джумуш берилгенди – адамны джашаууна къоркъуулу кёзюуде терк болушлукъ эталырча роботну къураб джыяргъа. Аны толу баджарыр ючюн, сохталагъа программированиеде билимлеринден сора да, биригиб, уста ишлерге, тюз оноу неда акъыллы оюм айта билирге керек болады. Аны себебли, бу джумуш чемпионатны эм къыйын этапларыны бириди.
Биз да, «Кванториум 09» командагъа джетишимле теджей, чемпионатда бизни республикабызны атын чыгъарлыкъдыла деб ышанабыз.

БАТЧАЛАНЫ Фатима.