Салпагъарланы Батдалны къызы Хубийланы Хаджият джигит аналаны бириди. Ол 1924-чю джыл Сары-Тюзде туугъанды.

Былайда школну иги бошаб, Къарачай шахарда устазла хазырлагъан училищеге киреди. Анда джетишимли окъуй тургъанлай, къазауат башланыб, таулу къызны билим джолуна тыйгъыч салынады. Хаджиятны эсеб ишлени бардырыргъа совхозгъа джибередиле. Билимли, фахмулу къыз къыйын ишин тыйыншлы бардырады. Хар джумушну терк, билимли толтуруб, ишчилени баджаргъан ишлерин тергеуню, контролда тутуб, алагъа хар затны юретгенлей, болушханлай турады.
Гитлерчи фашистле келирлерин билгенлей, совхозда ишлеген адамланы документлерин алыб келиб, бачхасында джерге басдырады. Аланы фашистлени къолларына тюшюрмегенди. Кеси немчала келген кёзюуде юйде турады. Къачмайды, букъмайды. Бизни джигит аскерчиле къанлы душманны былайдан сюргенден сора адамла ишлеб башларгъа мурат этедиле, алай а къагъытларын излеб, табалмай джунчуйдула.
Хаджият ол заманда, ышара-ышара, къоркъмагъыз, биригизни бир затыгъыз тас болмагъанды, аджашмагъанды деб, бачхада асырагъан джерин къаздырыб, джоппу-джоппу къысылгъан иги кесек къагъытны чыгъартады. Хазыр китабланы алыб, ким не, къаллай бир ишлегенин, трудоденлени ачыкъ этеди.
Адамла, бек къууаныб, анга разы боладыла. Хар адамгъа къаллай бир гардош, нартюх, мал берилирге кереклиси да белгили болады.
Бир кесек заман озуб, кёчгюнчюлюкню ачы джели джетеди. Къарачай халкъны элтиб, Орта Азия бла Къазахстанны къум тюзлерине тёгедиле. Салпагъарланы Батдалны юйюрю да халкъы бла бирге болады. Ала Джамбул областны Джамбул районуну «Биликуль» совхозуна тюшедиле.
Кёчюрюлген халкъла комендант режимни тюбюнде тургъанлары себебли, аланы адам тёзмезча къыйын болум кючлейди. Алай болса да, урунууну сюйген, рахатлыкъ излеген, хоншуларына болушхан, ала бла шохлукъ тутханлай тургъан джигер къарачай халкъ эс ташламайды. Аллай къыйын джыллада да кертиликни юлгюсюн кёргюзгенди. Къартла, тиширыула, сабийле, кече-кюн демей, планларын артыгъы бла толтуруб, къыйын ишде юлгюлю уруннгандыла. Уллу Ата джурт къазауатны заманында да тюрлю-тюрлю фронтлада гитлерчи фашистле бла къазауат этген аскерчилерибизге болушлукъгъа деб, кече да, кюн да ишлегендиле, талай кърал саугъала алгъандыла. Хаджият да аллай джигерлени бири болгъанды.
Хаджиятны «Биликуль» совхозда бухгалтер этедиле. Ол, ишни къолгъа алыб, тири бардырады. Совхозну къагъыт чотун керекли дараджада джарашдырады, бир затны чийсил къоймайды. Хар зат орнун табады. Таулу къыз зорлукъну, ачлыкъны, джаланнгачлыкъны джылларында кёб адамгъа джарайды. Инджилгеннге, онгсузгъа къолундан келген зат бла болушханлай турады. Заман бара, Хаджият хоншу Сокулук районда джашагъан Хубийланы Къурман-Алийни джашы Унух бла джашауун байлайды. Огъурлу юйюрге юч джаш бла эки къыз тууады. Зорлукъну къанатлары кесилиб, къарачай халкъ туугъан Джурту, Кавказгъа, къайтады. Хубийланы Унух юйдегиси бла Сары-Тюзге келиб орналады.
Огъурлу ананы юсюн кёб сабийни ауурлугъу басса да, ол ишлерге да заман табады. Былайда къуралгъан совхозну рабкоопунда бухгалтер къуллукъну бардырады. Хаджият бу ишде 17 джылдан аслам заманны урунады. Талай Хурмет грамота бла да саугъаланады. Беш сабийи да баш билим алыб, республиканы тюрлю-тюрлю санагъатларында урунадыла. Ала адеблери-намыслары бла джашайдыла. Туудукъла, аладан туугъанла да алайдыла.
Хубийланы Хаджият ариу халиси, адамлыгъы, ишленмеклиги, тыйыншлы юйдеги къурагъаны бла адамладан бюсюреу табханды.

Лепшокъланы Хусеин.