Уллу Хорламны 80-джыллыгъы байрамланады бу кюнледе. Саулай къралыбызны адамлары ол джарыкъ байрамгъа хазырланадыла, тюрлю-тюрлю ишле бардырыладыла.
Мен а Джёгетей элни атын айтдыргъан джигитлерибизни юслеринден бир-эки сёз айтыргъа излей эдим. Артыкъ да бек Къанаматланы Эсауаны джашы Ажууну юсюнден. Нек дегенде, ол Совет Союзну Джигити атха теджелиб, саугъасын алалмай къалгъанланы бири болгъанды.
Къарачай областны башха эллеринденча, Джёгетейден да къазауатха кёб джаш кетгенди. Ала уруш тюзледе батырлыкъ, ётгюрлюк танытыр ючюн къалмагъандыла. Джюзле бла джёгетейчиле орденле, медалла бла саугъаланнгандыла. Аладан талайы кёчюрюлген миллетни келечилери болгъанлары амалтын, саугъаларын алалмай къалгъандыла.
Минг бла джарымдан артыкъ адам кетгенди Джёгетей ёзенден, аладан 850 чакълы бири уруш тюзледе джан бергендиле. Аллахны рахматы болсун алагъа.
«Совет Союзну Джигити» деген ат эм сыйлы аскер саугъады да, Джёгетей элден юч уланыбыз тыйыншлы болгъанды ол атха.
Багъатырланы Умарны джашы Харун 1907-чи джыл Джёгетей элде туугъанды, 1943-чю джыл, гвардиячы майор чында, Совет Союзну Джигити ат берилгенди анга. Днепр сууну алгъан кёзюуде кёргюзген джигитлиги, ётгюрлюгю ючюн СССР-ни Баш Советини Президиуму 1943-чю джылны абыстол (ноябрь) айыны 17-де чыгъаргъанды Багъатыр улугъа Джигит атны атауну хакъындан Указны.
Гербекланы Чомайны джашы Магомет Джёгетейде 1923-чю джыл туугъанды. РФ-ны Президентини 1995-чи джыл къыркъаууз (сентябрь) айны 7-де чыкъгъан Указына кёре, Гербек улугъа, Уллу Ата джурт къазауатны джылларында фашист джыртхычла бла урушлада кёргюзген ётгюрлюгю, джигитлиги ючюн, Эресей Федерацияны Джигити ат аталгъанды.
Къаракетланы Кёккёзню джашы Юнюс Джёгетей элде 1919-чу джыл туугъанды. Анга да Эресей Федерацияны Джигити ат 1995-чи джыл аталгъанды.
Къанаматланы Эсауаны джашы Ажуу 1909-чу джыл Джёгетейде туугъанды. 1943-чю джылны хычаман (май) айында Севастополда Сапун тауну алгъан кёзюуде кёргюзген джигитлиги ючюн аскер башчыла аны Совет Союзну Джигити атха теджегендиле. Алай а репрессиягъа тюшген миллетни келечиси болгъаны амалтын тыйыншлы саугъа берилмей къалгъанды. Болса да, тюзюсю бла къарасакъ, Къанамат улу Джигитлени тизиминдеди, ётюрюкле, бюрократ чырмаула не бек тыйгъыч болуб кюрешселе да.
Бюгюнлюкде, Эресей кесини тамбласы ючюн къаты кюреш бардыргъан заманда, башха бир ёмюрде болмагъанча, бирлеширге керекбиз. Къралыбызны эркинлиги, бойсунмаулугъу ючюн джан бергенлени эсгерир, патриот сезимлени ёсдюрюр, тёлюлени араларында байламлылыкъны бегитир эмда джамагъатны бирлешдирир ючюн тарихни тюзюча сакъламай боллукъ тюлдю. Ол эсгериу джаш тёлюню игини амандан, кертини ётюрюкден айыра билирге юрете, тарихни тюрлендирирге излегенлеге къаршчы турургъа мадар берликди. Джамагъатны ангысын алджашдырыргъа, арада джаулукъну отун джандырыргъа, зорлукъ ишни ариуларгъа мадар берликди тарихни тюрлендириу. Тарих эсни сакълау къуру аны бла кюрешген алимлени тюл, хар бирибизни да борчубузду. Юйдегибизни, миллетибизни, къралыбызны тарихин барыбыз да билирге борчлубуз.
Къарачайны джигит уланларын эсгериу къуру алагъа сый берген бла къалмай, халкъыбызны тарих эмда маданият энчилигин сакълауну магъаналы кесегиди. Бу материал басмагъа чыкъгъандан сора Къанаматланы Ажууну да тыйыншлы саугъасы берилир, Джигитлерибизни саны аслам болур деб, ышанама. Уллу къралыбызгъа тёрт Джигитни берген Джёгетей элни аты да кенг белгили болур деб, ишексизме.
КЪАРАКЕТЛАНЫ Абдулну джашы Хасан.
