Джюрек джылыууну кючюн джая, джумушакъ, татлы тилде сёлеше, адамланы саулукъларын бакъгъан керти врачланы бириди мен хапарын айтыргъа излеген Къобаланы Кемалны къызы Зухра.
Анасыны атасы, Салпагъарланы Джашарбекни джашы Мухаджир, полковник болгъанды. Ол Уллу Ата джурт къазауатны ветераны, юрист эди. Сабийлерине, туудукъларына, билим алыб, усталыкъларыны юсю бла ишлеб, атларын сый бла айтдырлыкъларын борч этгенди.
Атасы, Хамитни джашы Кемал, Агропромстройну баш директору болуб туруб, алайдан пенсиягъа чыкъгъанды. Ол тутхан ишин махтаулу толтуруб, производствогъа джангы затла киргизиб, атын кенгнге айтдыргъанды.
Анасы, Салпагъарланы Мухаджирни къызы Любовь, Черкесскеде «Холодмаш» заводну баш конструктору къуллукъда болуб, анга салыннган джууаблы борчну мийик дараджада толтургъанлай тургъанды.
Зухра Черкесскеде Кемалны халкъны ашхы адетлерин тутхан, билим алыргъа тырмашхан юйдегисинде туугъанды. Орта школну иги бошагъандан сора, Ставрополдагъы медицина институтха кириб, 2000-чи джыл аны джетишимли тауусуб, ызы бла ординатурада окъуб, «терапия» усталыкъ алгъанды. Таулу къыз урунуу джолун Къарачай-Черкес республикан больницада башлайды. Алгъы бурун дежурный терапевт болады. Кече-кюн демей ауругъанлагъа къайгъырыб, аланы саулукъларын тюзете, къолундан келгенни этиб кюрешеди. Тамадала аны тирилигин, терен фахмусун, чыгъармачылыкъ ишин эсге ала, 2002-чи джыл джангы ачылгъан ревматология бёлюмге ишге кёчюредиле. Зухра айтхандан, ол алайда аурууланы кетере, джиклени, омурауланы, джумушакъ сингирлени багъыу джанындан ишлейди. Ол сынамын, билимин фармакологияда, анатомияда, ортопедияда хайырландырады. Адамгъа тюз диагноз салыб, хайыр келтирлик багъыу бардырады. Къанны анализин алдырады. Инструментал методланы юслери бла джиклеге ренография, УЗИ, МРТ, КТ, башха ишле этдиреди. Тутхан ишине кёб джангы мадар, амал киргизеди. Ишине тири джюрюш бере, татлы ауазы бла ушакъ эте, адамлыгъыны тёрюнде кёбге къайгъыра, саулугъун тюзетиб къууанч келтире, таукел алгъа барады. Таулу къыз коронавирус пандемияны заманында да кёб адамгъа болушханды. Талай адамгъа, диагнозуна кёре къаллай дарман ичерге кереклисин айтханды, аллайланы багъыб тургъанды. Зухра алай бла былайда 24 джыл ишлейди.
Ол бусагъатда энчи лабораторияланы биринде да ревматолог болуб ишлейди. Шахарда ревматологла болсала да, анга кёб адам келеди. Ол бир къуллугъунда анга барыб тургъанла, бери да джюрюйдюле. Джиклери ауругъанланы 90 проценти 40 джылдан уллуладыла. Зухра 24 джылны ичинде алгъан сынамын, билимин былайда да хайырландырады. Мында да адамланы джик, омурау аурууларына, сууукъ чабханнга, сингир ауруулагъа, сюекни къарыусуз болгъанына (остеопороз) да къарайды, аны кетерир джанындан хайыр келтирген мадарла къурайды.
Адамла айтхандан, Зухраны терен фахмусу, иги билими барды. Ауругъанлагъа ышарыб, ариу тилде сёлеше, тутхан ишини дараджасын кёлтюре, атын сый бла айтдырады.
Билимли врач адамланы саулукъларын бакъгъанда, къолундан келгенни аямайды. Ол энчи клиника ачар муратлыды, лицензиясы да барды. Анда джиклени, омурауланы, сингирлени, психикасын тюзетир джанындан тюз бакъгъандан сора да, суу бла да багъарыкъдыла. Чыкъгъан джеринден алыннган, тинтиуню ётген, биология, медицина халы болгъан, джылы гара сууну хайырландырлыкъдыла. Аны бла адамны къаллай аурууладан багъарыкъларын да белгилегендиле. Ол зат Черкесскеде боллукъду. Адам шахардан тышына чыкъмагъанлай, тюрлю-тюрлю дарман суула бла саулугъун багъарча мадар табарыкъды.
Зухра тутхан ишин сый бла этиб, ауругъанлагъа болушхан ашхы, уста врачланы бириди. Аны бир къызчыгъы барды. Лейлачыкъ биринчи классха барады. Анасы, аны джюрегине ашхылыкъ, игилик, сюймеклик гитче заманындан сингдире, ана джылыуун, нюрюн баласына бере джашайды.
Ол адамлагъа игилик излей, этген муратына джете, алгъа учунады.
Лепшокъланы Хусеин.
