Эресейни кюню, джаш байрамланы бири болса да, Ата джуртубузну эркинлиги белгиленнгени ючюн, барыбызгъа да магъаналыды. Аны тамыры 1990-чы джылладан келеди.
Тамам 35 джылны мындан алгъа РСФСР-ны халкъ депутатларыны I-чи съезди РСФСР башхалагъа бойсунмагъан кърал болгъаныны юсюнден декларация алгъан эди. Аны тамалында талай закон-джорукъ къуралыб, къралыбызны баш бошлугъуна аталгъан байрам белгилене башланнган эди.
«Эресейни кюню» деген ат бла бу байрам биринчи кере 1995-чи джыл никкол (июнь) айны 12-де белгиленнгенди. Кремль къалада къралыбызны ёсюмюне юлюш къошхан адамлагъа Эресейни кюню бла байламлы кърал саугъала берилиб да ол кюн башланнгандыла.
2001-чи джыл никкол (июнь) айны 12-де, Эресейни башхалагъа бойсунмагъан кърал болгъаныны юсюнден декларация алыннганына аталгъан къууанч джыйылыу болгъан эди. Анда РФ-ны Президенти Владимир Путин: «Бюгюнден башлаб, тарихибизни джангы бетлери джазылыб тебрейдиле. Законну тамалында джамагъатны излеми, адамланы эркинликлери баш болгъан къралны тарихи. Аны баш нюзюрю адамланы тынчлыкълы, иги джашарча, джетишимли болурча этиудю», – деген эди.
Андан бери джыл сайын никкол (июнь) айны 12-де законну эмда тюзлюкню тамалында къралыбызны башына эркин болгъанын джарыкъ белгилеученбиз.
Эркин, берекетли къралыбызны джер-джеринде да, адамланы излемлерине, джарсыуларына эс бёлюне, джашау турмушну игилендириуге аталгъан ишле тири бардырыладыла, сабийлеге, джаш адамлагъа, энчи ёсюм алыб, джюрек излемлери бла билимлерине, фахмуларына, болумларына кёре, иш орунлу болурча мадарла этиледиле.
Алай бла, кюнден кюннге хар неси табыракъ джарашдырыла баргъан Эресей бюгюнлюкде тюрлю-тюрлю дин ахлулары, кёб миллетли джамагъаты келишиулю, шох джашагъан деу кърал болуб турады.
Бурундан да аны тамалына салыннган, хар адамгъа да бирча багъалы затлагъа бусагъатда да уллу магъана бериледи.
Эресейни деулюгю ата-бабаларыбыздан башлаб бюгюнлюкге дери уруннган тёлюлени кючлеринден бегигенди. Бюгюнлюкде да къралыбызны ёсюмюне, аны келир заманын игилендириуге Уллу Ата джурт къазауатны эмда урунууну ветеранларыны юлгюлеринде ёсген устазла, врачла, инженерле, къурулушчула, башха устала къолларындан келгенича юлюш къошханлай барадыла. Аланы джетишимлери Эресейни баш байлыгъы тюз адамлары болгъанына шагъатлыкъ этедиле. Аллай, керти патриотланы кючлери бла бу къыйын заманда къралыбыз тышындан къатылыргъа излегенлеге бой бермей турады.
Эресей Федерация не заманда да халкъла арасында адамларын, алагъа магъаналы ишлени джакъларгъа хазыр тургъанды. Аны ол политикасын джакълар ючюн, джердешлерибиз бусагъатда бардырыла тургъан аскер къаугъада уллу джигитликле этедиле.
Аллах болушса, ата-бабаларыча, ала Хорламлы болурла, бютеу джамагъат да, джигитлерибиз бла ёхтемлене, Эресейни кюнюн да, башха байрамларыбызны да джарыкъ белгилей, мындан ары да рахат джашар.
СОЛТАНЛАНЫ Зульфия.
