Мындан алда Къарачай-Черкес Республиканы Уруп районунда, Уллу Хорламны 80-джыллыкъ юбилейине, Эресей Федерацияны Президенти Владимир Путин баямлагъан Ата джуртну къоруулаучуну кюнюне, Къарачай халкъ тарих джуртуна къайтханына 68 джыл толгъанына аталыб, уллу чаришле бардырылдыла.
Ол ишге къошулгъанланы арасында Къарачай-Черкес Республиканы Башчысыны эмда Правительствосуну Администрациясыны тамадасыны орунбасары Хубийланы Марат, КъЧР-ни Халкъ Джыйылыууну (Парламентини) Саулукъ сакълауну, социал политика бла спортну хакъындан комитетини тамадасы, «Къарачай – алан халкъ» джамагъат организацияны тамадасы Хубийланы Хасан, Уруп муниципал районну администрациясыны тамадасы Михаил Зайцев, Черкесскеде Багъыу-реабилитацион аралыкъны баш врачы Темрезланы Бориспий, «Бирикген Эресей» партияны джергили бёлюмюню секретары Боташланы Азрет-Алий, КъЧР-ни Халкъ Джыйылыууну (Парламентини) депутаты Боташланы Аслан, «Бирикген Эресей» партияны регионал исполкомуну тамадасы Джаммаланы Руслан, муниципал районланы, шахар округланы администрацияларыны тамадалары, башхала бар эдиле.
Былайда, джыйылгъан джамагъатны къууанчха бёлей, чаришледен сора да, спортну кёб тюрлюсюнден эришиуле бардырылдыла. Аланы арасында гир кёлтюрюу, таш атыу, белибаула бла тутуш бар эди. Къарачай-Черкесияны эстрадасыны артистлери аламат концерт кёргюзюб турдула.
Къарачай-Черкесиядан, хоншу регионладан джыйылгъан 80-дан аслам атлы алты кере чабышдыла.
Биринчи чариш эки джыл толгъан къарачай тукъумлу атла бла 1000 метр узакълыкъгъа болду.
Экинчи чариш юч джыл толгъан агъачлы къарачай тукъумлу атла бла 1400 метр узакълыкъгъа болду.
Ючюнчю чариш, таза къанлы болмагъан атла бла, джылларына, тукъумларына къаралмай, 1800 метр узакълыкъгъа болду.
Тёртюнчю чариш, КъЧР-ни Башчысы Темрезланы Рашидни ёчю ючюн, агъачлы тукъумлу атла бла 2400 метр узакълыкъгъа болду.
Бешинчи чариш, джылларына къарамай, агъачлы къарачай тукъумлу атла бла, Уллу Хорламны 80–джыллыкъ юбилейине аталыб, 3000 метр узакълыкъгъа болду.
Алтынчы чариш, Уруп районну джаш адамларына джораланыб, къарачай тукъумлу атла бла 1000 метр узакълыкъгъа болду.
Бу бардырылгъан ашхы иш Къарачай-Черкес Республикада ата-бабадан келген маданиятны, къарнаш шохлукъну, бирикмекликни, ангыламакълыкъны юлгюсюн кёргюздю. Тюрлю-тюрлю миллетле бир-бирине шохлукъну танытдыла. Былайда керти къууанч хал орун алгъан эди.
Алчакъланы Хусей.
