Халкъына халал къуллукъ этиб, джашауун сууаблыкъгъа атаб, фахмусун, билимин джайгъан онглу адамланы бириди Катчиланы Солтанны джашы Исмаил.
Атасы Катчиланы Умарны джашы Солтан «Горный» совхозну транспорт управлениесини тамадасы болуб ишлеб тургъанды. 300-ден аслам машинагъа джууаблы болгъанды. Ол заманда къралны Садовыйде, Эркин-Шахарда, Къарданикде, Зеленчукда, Урупда, Преграднада джаш эмда къарыусуз къой малланы багъыб, семиртиб, сатыб хайыр этген базалары болгъандыла. Аны къолунда машинала аланы кереклилерине къарагъандыла. Солтан тутхан ишин таб къураб, сый бла махтау бла толтургъанды.
Анасы Айбазланы Хаджи-Мырзаны къызы Хаулат, 5 сабийге къараб, джашауун аланы тыйыншлы адамла болуб ёсерлерине атагъанды.
Къарнашы Сапар Къарачай шахарда стоматология поликлиниканы тамадасыды.
Гитчелери Руслан республиканы шахарларында, районларында аптекала ачыб, адамланы дарман-дары бла баджарады.
Исмаил 1956-чы джыл аууз-герги (октябрь) айны 29-да, киши джуртда, Солтанны халкъыбызны ашхы адетлерин, адебин, намысын тутуб джашагъан, урунууну багъалатхан юйдегисинде туугъанды. 1957-чи джыл кёчюрюлген халкълагъа джуртларына къайтыргъа эркинлик берилгенинде, Катчиланы юйдегилери да халкъ бла бирге Кавказгъа къайтады. Исмаил Джёгетей Аягъы шахарда орта школну айырмагъа бошаб, Ставрополда эл мюлк институтха киреди. 1977-чи джыл аны махтау бла тауусуб, ветеринар врач усталыкъ алыб чыгъады. Таулу джаш урунуу джолун усталыгъыны юсю бла башлаб, 1977-чи – 1979-чу джыллада Украинада «Соцнаступ» мюлкню баш ветеринар врачы къуллукъну толтурады. 2001-чи джыл Москвадагъы кърал социал университетни джетишимли бошаб, юрист усталыкъ алады. Катчи улу, ючюнчю баш билим алыргъа тырмаша, 2007-чи джыл Эресейчи кърал социал университетде окъуб, «финансы и кредит» деген усталыкъ алыб чыгъады.
Фахмулу джаш джашау джолунда кёб тюрлю къуллукълада ишлейди. Невинномысск джюн комбинатда да производство участокну тамадасы болуб, ишге кёб джангы зат киргизеди. 1993-чю – 1999-чу джыллада адамланы турмуш джаны бла джумушларын баджаргъан системада тюрлю-тюрлю уллу къуллукъланы толтурады. Къарачай районда элчи-фермер мюлклени «Истоки» деген ассоциациясыны правлениесини тамадасы болуб, чемер къоллу улан, алгъа къарай, джетишимли урунады.
1999-чу джыл фахмулу, билимли джаш устаны Къарачай районну администрациясыны тамадасы къуллукъгъа саладыла. Исмаил, алайда кёб тюрлю джаны бла тыйыншлы ишлени бардыра, районну социал-экономика ёсюмюне энчи юлюш къоша, халкъдан сый табады.
2001-чи джыл Катчиланы Исмаилны Къарачай-Черкес Республиканы Правительствосуну Председателини биринчи орунбасары – Къарачай-Черкесияны финансла министри этедиле. Ишлеген заманыны ичинде бу санагъатны халын джангы дараджагъа чыгъарады. 2011-чи джыл республиканы Башчысыны кенгешчиси этедиле. Андан сора Катчи улу 2012-чи джылдан 2021-чи джылгъа дери Федерал казначействону Къарачай-Черкесияда управлениесини тамадасы къуллукъну толтурады. Ол бу къуллугъунда да тутхан ишине тири джюрюш береди. Хар затны таб джарашдыра, джангы мадарланы, амалланы хайырландыра, экономиканы ёсюмюне энчи юлюш къоша, адамладан бюсюреу табады.
Исмаил 2021-чи–2024-чю джыллада Къарачай-Черкес Республиканы Халкъ Джыйылыууну (Парламентини) депутаты, кеси оноуун кеси этген джергили управлениени комитетини тамадасы болады. 2024-чю джылдан башлаб, Къарачай-Черкес Республиканы Халкъ Джыйылыууну (Парламентини) 7-чи чакъырыууну депутатыды, табигъат байлыкълагъа, аланы хайырландырыугъа къарагъан комитетни тамадасыды. Республикада бу джаны бла анга салыннган джууаблы борчну сый бла толтурады.
Кърал, аны къыйынына багъа бере, кёб кере саугъалагъанды. Аланы арасында Совет Союзну 3 кере Джигити А.И. Покрышкинни медалы, саулай Эресейде тергеуню бардырыргъа къошхан юлюшю ючюн алгъан эмда башха медаллары, Эресейни федерал налог къуллугъуну, сюдю приставларыны федерал къуллугъуну, федерал казначействону Хурмет грамоталары, Эресейни финансла министрини Бюсюреу къагъыты дагъыда башха саугъалары бардыла.
Исмаил Эресей Федерацияны 2-чи класслы кърал кенгешчисиди. «Къарачай-Черкес Республиканы махтаулу экономисти» деген сыйлы атны джюрютеди.
Катчилары тукъум Исмаилны кеслерине тамадагъа сайлагъандыла. Катчи улу тукъумну юсю бла кёб ишни, джумушну толтурады.
Ол бусагъатдагъы къуллугъунда да, заманны излемине кёре тири джюрюш бере, республикагъа хайыр келтирлик джумушла бардырады. Адамла айтхандан, аны адамлыгъы, ишленмеклиги, джамагъатха къайгъырыуу, фахмусу, билими, чыгъармачылыкъ кючю уллуду, кёлю ачыкъды, сезимлери тазадыла.
Лепшокъланы Хусеин.
