Анга Ставрополь крайны келечилери да къошулгъандыла.
Конкурсха келгенлени алларында КъЧР-ни урунуу бла социал ёсюмюню министрини заместители Хубийланы Фатима, сёлешиб, джырны байрамы бла алгъышлагъанды. Джыр конкурсда кеслерини фахмулулукъларын коррекцион бютеубилим берген школну сохталары, сангырауланы Бютеуроссия обществосуну джергили эмда Ставрополь крайда орналгъан бёлюмлерини келечилери кёргюзгендиле.
Хар джырлагъан адам, кесини джюрегин саулай джырны ичине салгъанча, алай джырлагъаны себебли, жюриде олтургъанла, конкурсну магъанасын кёлтюрюб, анга фестиваль атаргъа оноу этгенлерин залдагъыла бек джаратхандыла.
Джырлагъанланы барына да дипломла эмда эсде къалырча саугъала берилгендиле.
Сангыраула джырлагъан джыр (жестовая песня) кесича бир тюрлю бир жанрды. Алай сынгар сангыраула эмда иги эшитмегенле джырлайдыла. Фонограммада музыканы орнуна джырчы вибрация бла хайырланады. Хар сёзню джырчы къолун къымылдатыб сездиреди, ауузун да сёз эшитдирмей къымылдатады. Бир джырны хар джырчы кесича джырлайды – экеулен бир-бирин эниклемейди.
