Тюзюуюн адамланы ачхаларын иелерге ууланнган аманлыкъчыла, кеслерине ийнандырыр ючюн, тюрлю-тюрлю лагъымла, ётюрюкле къурагъанлай турадыла. 2025-чи джыл ала аманлыкъ ишлерин телефон бла этерге тюзелгендиле. Хыйлачыла хайырландыргъан амалланы билиб, адамла аладан сакълансала керекди.

Аманлыкъчыла телефон бла къонгурау къагъыб, кеслерин социал халны ачыкълау бла кюрешген къуллукъчулача танытыб, тюрлю-тюрлю соруула бередиле. Не къадар кёб сёлешдириб, ала адамланы ауазларын джаздырадыла. Артда нейросетде ол ауазлагъа ушашла къураб, ол адамланы ауазлары бла сом-шай тилеб, аланы джууукъларына, тенглерине СМС-ле иедиле. Адамны ауазы къуру 20 секунд джаздырылса да, нейросетде ушаш ауаз къурар амал барды.
СМС-де чыкъгъан ауаз керти болмагъанын ангылатмаз ючюн, ала телефон иги тутмагъаннга санарча, башха тауушла да къошадыла. Алай бла, таныгъан адамыны ауазын эшитген, аны тилегине джууаб береди, амалы болса, джукъ да сормагъанлай ачха джибереди.
Къарачай-Черкес Республиканы МВД-ны Дознаниени хакъындан бёлюмю адамланы сакъ болургъа чакъырады.
– Танымагъан номерлеригизден къонгурау къагъылса, кесигиз да джууаб бермегиз, эт-джен адамларыгъызгъа да айтыб, ала да сёлешмезча этигиз;
– энчи хапарыгъызны, документлеригизни номерлерин, SMS эмда PUSH билдириуле бла келген кодланы бир адамгъа да айтмагъыз;
– танымагъан адамларыгъыз теджеген приложениелени телефонларыгъызгъа салмагъыз;
– дистанцион халда хыйлачылагъа алдатханыгъыз болса, ала бла ушагъыгъызны белгилеген СМС-лени сакълар мадарла этиб, полициягъа хапарыгъызны дженгил билдиригиз.
Къарачай-Черкес Республиканы Ич ишлени хакъындан министерствосуну къуллукъчулары (87822) 29-70-22, 29-20-20, 102, 112 телефонла бла кече-кюн да байламлылыкъгъа чыгъадыла.

КъЧР-ни МВД-ны Дознаниени хакъындан бёлюмю.