Къарачай-Черкес Республикадан иги окъугъан, олимпиадалада, конкурслада школларыны атларын айтдыргъан, кёбчюлюк-джарыкълыкъ, джамагъат ишлеге, спортха тири къошулгъан 125 сабий «Артек» деген лагерде солургъа кетгенди.
«Артек» халкъла арасы солуу аралыкъды. Ол Къарачай-Черкес Республиканы сабийлерине кесини 14-чю сменасында солуб, кюч-къарыу алырча, энтда путёвкала джибергенди.
Алай бла, бюгюнлюкде Къобан, Зеленчук, Абаза, Гитче Къарачай, Джёгетей Аягъы районланы, аны кибик Черкесск эмда Къарачай шахарланы сабийлери андадыла. «Артек» кесини санагъатында эм ашхыланы бирине саналады. Сабийлени солууларын къурауда аны ишине халкъла арасы дараджада огъуна асыулу багъа берилгенди.

«Артек» деген халкъла арасы сабий аралыкъгъа тюшген сабийле тюрлю-тюрлю темала бла байламлы билим берген, саулукъну игилендирирге джораланнган, спортха къызындыргъан, фахму джилтинни ачыкъларгъа мадар берген программалагъа къошулургъа амал табадыла.